Fitaccen jarumin fina-finan Nollywood, IK Ogbonna, ya bayyana irin radadin da yake ji bayan rasuwar babban abokinsa, Alexx Ekubo, yana mai cewa har yanzu bai iya amincewa da cewa marigayin ya rasu ba.
Da yake jawabi a wajen taron wakoki da addu’o’in bankwana da aka gudanar domin girmama Alexx Ekubo a Jihar Legas, Ogbonna ya ce sau da dama yana daukar wayarsa domin kiran abokin nasa, kamar yana fatan zai sake jin muryarsa a wani karin lokaci.
Jarumin ya bayyana cewa duk da cewa suna samun sabani a wasu lokuta kamar yadda abokai ke yi, dangantakarsu ta kasance mai karfi da cike da kauna.
A cewarsa, Alexx Ekubo ba kawai aboki ba ne, har ila yau mutum ne da ya kasance yana karfafa masa gwiwa wajen kusantar Allah da kuma tsayawa masa a lokutan wahala.
“Ko a tattaunawarmu ta karshe, ya sake tabbatar min cewa zai kasance tare da ni ko da kowa ya juya min baya. Ina godiya ga dukkan abokaina na yanzu da na gaba, amma ba za a sake samun wani Alexx ba,” in ji Ogbonna cikin alhini.
Ya bayyana cewa har yanzu yana mamakin yadda zai iya warkewa daga radadin rasa mutumin da ya yi masa alkawarin kasancewa tare da shi a kowane hali.
Taron addu’ar da wakokin bankwana ya kasance cike da jimami, inda abokan sana’a da masoya marigayin suka halarta domin yi masa bankwana kafin jana’izarsa.
Wasu daga cikin mahalarta taron sun kasa boye alhininsu, ciki har da fitaccen mai zanen kaya, Yomi Casual, wanda aka gani yana zubar da hawaye yayin da ake gabatar da jawabin girmamawa ga marigayin. :::