Sanatan da ke wakiltar mazabar Plateau Central a Majalisar Dattawa, Diket Plang, ya sake jaddada kudirinsa na bunkasa ilimi, karfafa matasa, inganta tsaro da kuma samar da ci gaba a matakin karkara a fadin mazabarsa.
Sanatan ya bayyana hakan ne yayin kaddamar da rabon kayayyakin tallafi da aka tanada domin inganta ilimi, tsaro, wasanni da kuma bunkasa tattalin arzikin al’umma a Plateau Central.
A cikin shirin tallafin, Sanata Plang ya bayar da motar daukar mutane mai kujeru 18 ga Kwalejin Koyon Fasahar Lafiya ta Mwaghavul da ke Pushit, sannan ya kuma bai wa Kwalejin Koyon Fasahar Lafiya ta Jihar Plateau da ke Pankshin wata irin wannan mota.
An gudanar da mika motocin ne tare da Kwamishinan Ilimi na Jihar Plateau, Dakta Kachollom Pyam Gang, a wasu taruka daban-daban da aka shirya.
Domin karfafa tsaron al’umma, an kuma raba babura 21 ga jami’an tsaro da kungiyoyin sa-kai domin taimakawa wajen gudanar da ayyukan tsaro a yankunan mazabar.
Hakazalika, an rabawa al’umma sama da injinan nika 50 domin tallafawa kananan sana’o’i da bunkasa tattalin arzikin iyalai.
Shirin ya kuma hada da rabon kayan wasanni da rigunan wasa ga makarantu 10 a mazabar, da nufin karfafa harkokin wasanni da bai wa matasa damar nuna kwarewarsu.
Da suke jawabi a lokuta daban-daban, shugaban Kwalejin Koyon Fasahar Lafiya ta Pankshin, Emmanuel Mahan, da takwaransa na Kwalejin Mwaghavul da ke Pushit, Ignatius Yamson, sun yabawa Sanatan bisa tallafin da ya bayar.
Sun ce motocin za su taimaka matuka wajen saukaka zirga-zirgar dalibai da ma’aikata yayin gudanar da harkokin karatu da kuma ayyukan asibiti.