Babban Bankin Najeriya (CBN) ya bayyana cewa sauye-sauyen tattalin arziki da aka aiwatar cikin watanni 34 da suka gabata sun kafa tubali mai ƙarfi domin bunƙasar tattalin arzikin ƙasa, daidaiton tsarin kuɗi, samar da ayyukan yi da kuma rage talauci.
Hakan na kunshe ne cikin jawabin Daraktar Sashen Hulɗa da Jama’a da Masu Zuba Jari ta CBN, Hakama Sidi Ali, wanda Mataimakin Darakta, Michael Dalyop, ya wakilta a bikin CBN Fair da aka gudanar a Bauchi.
Ta bayyana cewa daga cikin manyan sauye-sauyen da aka aiwatar akwai haɗa tsarin kasuwar canjin kuɗaɗen ƙasashen waje, ƙara gaskiya a harkar musayar kuɗi, ƙarfafa bankuna ta hanyar sake ƙara jarinsu, ƙaddamar da Non-Resident Bank Verification Number (NRBVN), tsarin B-Match na cinikin kuɗaɗen waje da kuma ƙaddamar da Nigeria Payments System Vision 2028 (PSV 2028).
Sidi Ali ta ce CBN ta kuma aiwatar da tsarin Cash Reserve Ratio (CRR) na kashi 75 cikin 100 kan wasu kuɗaɗen gwamnati domin inganta tafiyar da kuɗi da rage matsin hauhawar farashi.
Ta ƙara da cewa sabon tsarin Nigerian Overnight Financing Rate (NOFR) zai ƙara gaskiya da inganci a harkokin kuɗaɗen gajeren lokaci bisa ƙa’idojin ƙasa da ƙasa.
A cewarta, alkaluman baya-bayan nan sun nuna cewa hauhawar farashi ta sauka daga kashi 15.93 cikin 100 a watan Mayu zuwa kashi 15.91 cikin 100 a watan Yunin 2026, yayin da darajar naira ke ci gaba da ƙarfafa.
Ta bayyana cewa gibin da ke tsakanin farashin canjin kuɗi na hukuma da na kasuwar Bureau de Change ya ragu zuwa kusan kashi biyu cikin 100, yayin da ajiyar kuɗaɗen ƙasashen waje ta Najeriya ta haura dala biliyan 52.5 a watan Yulin 2026, mafi girma cikin shekaru 17.
Sidi Ali ta bukaci ‘yan Najeriya su rika amfani da bayanan da CBN ke fitarwa ta hanyoyin sadarwa na hukuma kawai, tare da kira ga jama’a da su mutunta naira ta hanyar gujewa yayyafa ta, lalata ta ko yin jabunta.
A nasa jawabin, Shugaban Reshen CBN na Bauchi, Michael Dalyop, ya ce dabarun bankin na shekarun 2024 zuwa 2028 sun mayar da hankali kan tabbatar da daidaiton kuɗi da bunƙasa tattalin arziki ta hanyar samar da damar samun ayyukan banki ga daidaikun mutane, ƙananan kasuwanci da manyan kamfanoni.
Ya kuma ce taron ya haɗa masu ruwa da tsaki daga bangarori daban-daban domin wayar da kan jama’a kan hanyoyin biyan kuɗi na zamani, kariyar masu amfani da harkokin kuɗi da kuma inganta ilimin tattalin arziki.