Kamfanin fasahar kuɗi na Flutterwave ya bayyana sabon buri na zama cibiyar gudanar da harkokin kuɗi a Afirka, tare da amfani da fasahar stablecoin wajen sauƙaƙa biyan kuɗaɗe tsakanin ƙasashe daban-daban a nahiyar.
Shugaban kuma wanda ya kafa kamfanin, Olugbenga “GB” Agboola, ne ya bayyana hakan yayin taron Money20/20 Europe da aka gudanar a birnin Amsterdam na ƙasar Netherlands.
Agboola ya ce stablecoin na kawo sauyi mai girma a tsarin biyan kuɗaɗe tsakanin ƙasashen Afirka, inda ya bayyana cewa kuɗi na iya tafiya cikin sauri ta hanyar intanet maimakon jiran tsarin bankuna.
Ya bayyana cewa Flutterwave na shirin haɗa stablecoin cikin tsarin ayyukanta na yau da kullum domin samar da sauƙi ga kamfanonin da ke gudanar da kasuwanci a ƙasashe daban-daban na Afirka.
A cewarsa, duk da cewa ana iya tura kuɗi daga walat zuwa walat cikin sauƙi, har yanzu akwai buƙatar ingantaccen tsarin biyan kuɗi da zai tabbatar da bin ƙa’idojin doka, kariyar kuɗin kwastomomi da kuma isar da kuɗi zuwa asusun bankuna na cikin gida.
Agboola ya kuma ce Flutterwave ta shafe shekaru goma na farko tana haɗa hanyoyin biyan kuɗi daban-daban na Afirka ta hanyar API guda ɗaya, yayin da shekaru goma masu zuwa za su mayar da hankali kan gina cikakken tsarin harkokin kuɗi na nahiyar.
Ya ƙara da cewa samun lasisin bankin microfinance a Najeriya wani muhimmin mataki ne da zai ba kamfanin damar faɗaɗa ayyukansa da rage matsalolin da ke tattare da mu’amalolin kuɗi.
Kamfanin ya kuma bayyana cewa yana ci gaba da faɗaɗa haɗin gwiwa da manyan kamfanonin fasahar kuɗi na duniya domin gina abin da ya kira mafi girman tsarin stablecoin da aka tanada bisa ƙa’ida a Afirka, domin tallafa wa ci gaban tattalin arzikin dijital da kasuwancin ƙetare a nahiyar.