Kotun ta yanke hukunci mai muhimmanci inda ta tabbatar da ‘yancin ‘ya’yan wani dan asalin Jos North kan a ba su matsayin ‘yan asali (indigene) bisa haihuwarsu da kuma asalin mahaifinsu, tare da bayyana cewa hana su takardar shaida na nuna wariya ne.
Masu shigar da kara sun nemi kotu ta fayyace ko Fatima Akawu, wadda aka haifa a karamar hukumar Jos North kuma mahaifinta yana daga cikin ‘yan asalin yankin, ta cancanci a ba ta Certificate of Indigene duk da cewa ta fito daga kabilar Hausa.
Sun kuma tambayi kotu ko kin ba ta takardar indigeneship amma aka ba ta Residential Certificate, tare da bayar da Certificate of Indigene ga wani Dung Bot daga kabilar Berom a rana guda, ya sabawa kundin tsarin mulkin Najeriya da kuma Yarjejeniyar Kare Hakkin Dan Adam ta Afirka.
Bugu da kari, masu karar sun bayyana cewa matsayin mahaifin Fatima Akawu, wanda ya taba wakiltar mazabar Jos North a Majalisar Wakilai a shekarar 1983, ya tabbatar da cewa ‘ya’yansa na da hakkin a dauke su ‘yan asalin yankin.
Sun kuma nemi kotu ta bayyana ko Residential Certificate na da karfin doka wajen tantance cancantar samun damammaki da gata da ake ware wa ‘yan asali.
Mai shari’a Donglong, yayin yanke hukunci, ya amince da dukkan bukatun masu kara, inda ya bayyana cewa akwai hujjoji masu karfi da ba a kalubalanta ba da suka nuna cewa an tauye musu hakki.
Alkalin ya ce hukuncin ya ta’allaka ne kan kare ‘yancin ‘yan kasa daga nuna wariya bisa kabila ko yanayin haihuwa, yana mai bayyana cewa abin da karamar hukumar ta yi ya sabawa kundin tsarin mulki.
Ya kara da cewa bayar da Certificate of Indigene ga wani mutum daga wata kabila a lokaci guda da aka hana wata mai bukata takardar ya nuna wariya da ba ta dace ba.
Kotun ta kuma bayyana cewa ‘ya’yan mai kara na biyu, ciki har da Fatima Akawu, suna da ‘yancin a dauke su ‘yan asalin Jos North bisa matsayin mahaifinsu da kuma wurin haihuwarsu.
A karshe, kotun ta haramta wa karamar hukumar Jos North ci gaba da amfani da Residential Certificate a matsayin madadin Certificate of Indigene, tana mai bayyana hakan a matsayin abin da ba ya da tushe a doka kuma ya sabawa kundin tsarin mulki.