Wata babbar kotu a Los Angeles County ta yi watsi da zarge-zargen safarar jima’i da aka shigar kan Kristina Khorram, wata aminiya ta kusa ga fitaccen mawaki Sean “Diddy” Combs.
A cewar takardun kotu da aka samu, alƙalin kotun ya yanke hukunci a watan Yuni cewa dukkanin tuhumar da Phillip Pines, tsohon ma’aikacin Diddy, ya shigar kan Kristina ba ta da hujja.
Kotun ta ce Phillip bai kawo wata shaidar da za ta nuna cewa Kristina tana da hannu ko masaniya kan zargin cin zarafi ko safarar jima’i da ake zarginta da shi ba.
Haka kuma kotun ta bayyana cewa ba a tabbatar da cewa ta amfana ko ta san abin da ake zargin ba.
Kristina, wacce ake yawan kwatantawa a matsayin “Ghislaine Maxwell” ta Diddy, ta musanta dukkan zarge-zargen da aka yi mata.
A baya, Phillip Pines wanda ya yi aiki da Diddy tsakanin 2019 zuwa 2021, ya shigar da ƙara yana zargin mawakin da laifukan safarar jima’i da cin zarafi. Ya kuma ce shi ne ke shirya otal-otal da kayan da ake amfani da su a lokutan da ya kira “freak-offs,” inda ake zargin ana amfani da abubuwa kamar baby oil da kayan jima’i.
Lauyoyin Diddy sun musanta zarge-zargen, suna mai cewa ba shi da hannu a kowace irin safarar jima’i ko cin zarafi.