Tsohon mai tausa jikin fitaccen ɗan wasan Argentina, Diego Maradona, Salvatore Carmando, ya bayyana cewa Maradona ya faɗa masa tun kafin wasan daf da na kusa da na ƙarshe na Gasar Kofin Duniya ta 1986 da Ingila cewa zai ci wani abin mamaki da duniya ba za ta manta da shi ba.
A wata hira da FIFA ta wallafa, Carmando ya ce kafin a fara wasan a filin Estadio Azteca da ke Mexico, Maradona ya ce dole ne ya ci wata ƙwallo ta musamman, ko ta wace hanya ce.
Bayan da Maradona ya zura ƙwallonsa ta biyu, wadda daga baya aka raɗa wa suna “Goal of the Century”, Carmando ya ce tauraron ya rungume shi yana cewa, “Na gaya maka zan yi hakan, kuma na yi.”
A wannan wasa, Maradona ya ci ƙwallaye biyu a nasarar da Argentina ta samu a kan Ingila da ci 2-1. Ƙwallon farko ita ce shahararriyar “Hand of God”, yayin da ta biyu ta zama ɗaya daga cikin mafi kyawun ƙwallayen da aka taɓa ci a tarihin ƙwallon ƙafa.
Carmando ya bayyana cewa dangantakarsa da Maradona ta wuce ta kulob ɗin Napoli, domin Maradona ne ya nace sai ya kasance tare da tawagar Argentina a Gasar Kofin Duniya ta 1986 a matsayin mai kula da lafiyarsa.
Ya kuma tuna yadda miliyoyin mutane suka tarbi tawagar Argentina bayan lashe kofin duniya, yana mai cewa har yanzu mafi darajar abin tunawarsa shi ne kwafin kofin duniya da yake adanawa.
A ƙarshe, Carmando ya yi wa Maradona addu’a da yabo, yana cewa shi mutum ne mai kirki wanda ya taimaka wa mutane da dama, kuma irin sa ba kasafai ake samu ba.