Bangaren raya kasa na Bankin Zuba Jari na Tarayyar Turai (EIB Global) da Bankin Raya Najeriya (DBN) sun rattaba hannu kan yarjejeniyar samar da tallafin kudi na Yuro miliyan 200 domin tallafa wa kananan da matsakaitan ‘yan kasuwa a Najeriya, musamman masu aiki a bangarorin tattalin arzikin zamani da kare muhalli.
An sanya hannu kan yarjejeniyar ne a hedikwatar DBN da ke Legas, yayin wani taro da ya samu halartar Mataimakin Shugaban EIB, Ambroise Fayolle, da manyan jami’an Bankin Raya Najeriya.
Shirin na da nufin saukaka samun rance ga kananan sana’o’i da matsakaitan kamfanoni (MSMEs), musamman wadanda ke aiki a fannoni kamar noma, makamashi mai sabuntawa, fasahar zamani da kirkire-kirkire.
Bangarorin biyu sun bayyana cewa kudaden za su taimaka wajen bunkasa kamfanoni masu zaman kansu, karfafa harkokin kasuwanci da samar da ayyukan yi ta hanyar bai wa cibiyoyin hada-hadar kudi damar bai wa ‘yan kasuwa rance cikin sauki.
Haka kuma, an tsara shirin domin taimakawa Najeriya wajen sauya salon tattalin arzikinta zuwa wanda ya fi kare muhalli, ta hanyar kara tallafawa kamfanonin makamashi mai sabuntawa da na harkokin noma.
A bangaren noma, ana sa ran tallafin zai kara yawan amfanin gona, inganta hanyoyin samar da kayayyaki a cikin gida da kuma taimakawa wajen tabbatar da wadatar abinci.
A bangaren makamashi kuwa, kudaden za su taimaka wajen fadada samun makamashi mai tsafta, rage hayakin da ke gurbata muhalli da kuma kara karfin al’ummomi wajen jure sauyin yanayi.
Da yake jawabi yayin rattaba hannu kan yarjejeniyar, Mataimakin Shugaban EIB, Ambroise Fayolle, ya ce jarin zai taimaka wajen kara karfin gasa ga kamfanoni masu zaman kansu a Najeriya tare da inganta manufofin ci gaban fasaha da kare muhalli.
Ya kara da cewa tallafawa kasuwancin da ke amfani da fasahar zamani zai kara inganci da gaskiya a harkokin kasuwanci, yayin da tallafin ayyukan kare muhalli da mata ‘yan kasuwa zai taimaka wajen bunkasa tattalin arziki mai anfani ga kowa.
Shi ma Babban Darakta kuma Shugaban Bankin Raya Najeriya (DBN), Dakta Tony Okpanachi, ya bayyana yarjejeniyar a matsayin wani babban ci gaba wajen kokarin samar da dorewar bunkasar tattalin arzikin Najeriya.
A cewarsa, kudaden za su bai wa cibiyoyin hada-hadar kudi damar kara tallafawa kananan da matsakaitan ‘yan kasuwa a muhimman bangarori tare da hanzarta sauyin Najeriya zuwa tattalin arzikin zamani mai amfani da kirkire-kirkire da fasahar dijital.
Ya ce hadin gwiwar ta yi daidai da manufar DBN na bunkasa tattalin arziki mai dorewa, samar da ayyukan yi da kuma inganta rayuwar al’umma ta hanyar saukaka samun jari.
Wannan sabon tallafin wani bangare ne na shirin Global Gateway Initiative na EIB Global, wanda ke da nufin tallafawa ci gaban tattalin arziki mai dorewa, hadin kai da juriya a Najeriya.
Bankin EIB ya bayyana cewa ya zuba kusan Yuro miliyan 500 a bangaren hada-hadar kudi na Najeriya cikin shekaru da dama domin tallafawa bunkasar kamfanoni masu zaman kansu.
Tun bayan fara aiki a Najeriya a shekarar 1978, bankin ya zuba kusan Yuro biliyan 2.3 a ayyuka daban-daban da suka hada da sufurin birane, kare muhalli, fasahar zamani, harkokin noma da kuma tallafawa kananan da matsakaitan kamfanoni.