Fitaccen jarumin Nollywood, Chiwetalu Agu, ya bayyana alhininsa kan rasuwar abokin aikinsa Alexx Ekubo, inda ya bayyana mutuwarsa a matsayin babban rashi ga masana’antar shirya fina-finai ta Najeriya.
A cikin wani bidiyo da ya wallafa a shafinsa na Instagram ranar Alhamis, Agu ya ce ya yi matukar kaduwa da samun labarin rasuwar marigayin, yana mai bayyana shi a matsayin jarumi mai hazaka, kwazo da kuma kyakkyawar makoma a harkar fim.
“Ka huta lafiya Alexx Ekubo. Na yi matukar bakin ciki da rasuwarka. A matsayina na jarumi kuma wanda ya shafe shekaru da dama a wannan sana’a, na san irin kauna, sadaukarwa da kokarin da ka yi wajen bunkasa aikinka,” in ji Agu.
Ya kara da cewa masana’antar Nollywood ta yi rashin wani fitaccen mai ba da labari wanda har yanzu yake da sauran gudunmawar da zai bayar ga harkar fim.
“A lokacin da mutum mai matashiya da hazaka kamar ka ya tafi da wuri, lamarin yana da zafi matuka. Fagen wasan kwaikwayo da fina-finai ya rasa ba kawai jarumi ba, har ma da wani mai bayar da labari wanda yake da sauran rawar da zai taka,” ya bayyana.
Chiwetalu Agu ya kuma mika sakon ta’aziyyarsa ga iyalan marigayin, abokansa da masoyansa, tare da addu’ar Allah Ya ba su hakurin jure wannan babban rashi.
Ya ce duk da cewa Alexx Ekubo ya riga ya bar duniya, ayyukansa da gudunmawar da ya bayar a masana’antar Nollywood za su ci gaba da kasancewa cikin zukatan masoya da masu kallon fina-finansa.
Rasuwar Alexx Ekubo ta janyo alhini a tsakanin jaruman Nollywood da dubban masoyansa, inda mutane da dama ke ci gaba da bayyana jimaminsu tare da yi masa addu’ar samun rahama.