Asusun Bayar da Lamuni na Duniya (IMF) ya sake rage hasashen ci gaban tattalin arzikin duniya na shekarar 2026, inda ya danganta hakan da tasirin rikicin Gabas ta Tsakiya, duk da ci gaban fasahar wucin gadi (AI).
A sabon rahotonta, IMF ta kiyasta cewa tattalin arzikin duniya zai bunkasa da kashi 3.0 cikin 100 a shekarar 2026, maimakon kashi 3.1 da ta yi hasashe a watan Afrilu. Haka kuma, ta ce hauhawar farashin kayayyaki a duniya za ta kai kashi 4.7 cikin 100 a bana.
Rahoton ya bayyana cewa yakin da ya shafi Iran da kuma tasirin da ya yi ga zirga-zirgar man fetur ta mashigin Hormuz sun kara janyo tashin farashin makamashi tare da rage saurin ci gaban tattalin arziki.
Sai dai IMF ta ce ci gaban da ake samu a bangaren fasahar AI ya taimaka wajen rage girman illar rikicin, tare da hasashen cewa tattalin arzikin duniya zai farfado zuwa kashi 3.4 cikin 100 a shekarar 2027.
Rahoton ya kuma nuna bambanci tsakanin kasashe, inda masu fitar da makamashi suka fi cin gajiyar hauhawar farashin mai, yayin da kasashen da ke dogaro da shigo da makamashi suka fi fuskantar kalubale.
IMF ta rage hasashen ci gaban tattalin arzikin yankin Gabas ta Tsakiya da Tsakiyar Asiya zuwa kashi 0.7 cikin 100, sannan ta rage hasashen yankin Tarayyar Turai zuwa kashi 0.9 cikin 100. Sai dai ta dan kara hasashen ci gaban tattalin arzikin kasar Sin zuwa kashi 4.6 cikin 100.
Duk da haka, IMF ta gargadi cewa idan rikicin Gabas ta Tsakiya ya sake tsananta, zai iya haddasa karin tashin farashin kayayyaki, dagula hanyoyin samar da kayayyaki, da kuma kara matsin lamba ga tattalin arzikin duniya.