Kamfanin Nigerian National Petroleum Company Limited (NNPC) ya sanar da kammala muhimmin aikin gina bututun iskar gas na Obiafu-Obrikom-Oben (OB3) a ƙarƙashin Kogin Neja, matakin da ake ganin zai inganta samar da iskar gas a Najeriya.
A cewar kamfanin, aikin ya haɗa da tona kusan kilomita biyu a ƙarƙashin kogin ta amfani da fasahar zamani ta horizontal directional drilling, wacce ake amfani da ita wajen gina manyan ayyuka a wurare masu wahala.
NNPC ya bayyana cewa wannan ci gaban zai buɗe cikakken ƙarfin bututun mai tsawon kilomita 130, wanda zai iya ɗaukar kusan billion 2 na gas a kowace rana.
Haka kuma, an ce kammala wannan sashi zai taimaka wajen samar da ƙarin miliyan 500 na gas a kowace rana ga kasuwannin cikin gida, wanda zai inganta wutar lantarki, masana’antu da kuma fitar da gas zuwa ƙasashen waje.
Shugaban NNPC, Bayo Ojulari, ya ce wannan nasara tana nuna jajircewar gwamnati da kamfani wajen inganta harkar makamashi a ƙasar.
Ya ce:
“Kammala wannan aiki wani muhimmin mataki ne da zai inganta samar da iskar gas, wutar lantarki da ci gaban tattalin arziki a Najeriya.”
Ojulari ya kuma ce aikin OB3 yana cikin manyan tsare-tsaren gwamnatin tarayya na ƙara yawan samar da mai da gas zuwa matakin da zai ƙara inganta tattalin arzikin ƙasa zuwa shekarar 2030.
Aikin OB3 yana da matuƙar muhimmanci a tsarin makamashin Najeriya, domin zai haɗa yankunan da ke samar da gas a gabashin ƙasa da sauran sassan ƙasar, tare da taimakawa rage ɓarnar gas (gas flaring) da inganta amfani da shi a cikin gida.
Masana sun ce kammala wannan sashi zai taimaka wajen tabbatar da tsayayyen tsarin iskar gas a Najeriya tare da ƙarfafa matsayinta a matsayin babbar cibiyar gas a yankin Yammacin Afirka.