Shahararriyar mai sayar da ganyen magani kuma mai tasiri a kafafen sada zumunta, Eniola Fagbemi wacce aka fi sani da Sisi Alagbo, ta nemi gafarar masoyanta bayan wani bidiyo na sirri (sex tape) da ya bayyana a intanet ya jawo cece-kuce mai yawa.
Rahotanni sun bayyana cewa bidiyon da ya bazu a kafafen sada zumunta a ranar Litinin, ya nuna wani abin kunya da ya shafi Sisi Alagbo, mijinta Adesola Hakeem, da wata mace ta uku. Wannan abu ya jawo martani daga jama’a, inda wasu suka nuna rashin jin daɗi yayin da wasu kuma suka yi ta tattauna dalilin abin da ya faru.
A cikin sakon da ta wallafa a shafinta na Facebook a ranar Laraba, Sisi Alagbo ta bayyana cewa tana cikin mawuyacin hali, tana fama da damuwa har ma ta kasa cin abinci da bacci tun bayan bazuwar bidiyon.
Ta ce ta amince da kuskuren da ta yi kuma ta nemi gafarar jama’a, inda ta rubuta cewa:
Ta yi nadama kan abin da ya faru
Ta nemi afuwar masoyanta da duk wadanda abin ya bata wa rai
Ta ce tana cikin matsanancin damuwa har magungunan bacci ma ba sa yi mata aiki
Ta kuma roki jama’a da su tausaya mata, kada su ci gaba da zaginta ko zagayenta a kafafen sada zumunta, tana mai cewa tana cikin wani hali mai tsanani.
Sisi Alagbo ta kara da cewa ita na rayuwa ne da kafafen sada zumunta kuma wannan lamari na iya shafar rayuwarta sosai, inda ta bayyana fargabar cutar da kanta idan matsin lamba ya ci gaba.
A baya, Sisi Alagbo ta shahara ne ta hanyar tallata magungunan gargajiya (agbo) da kuma nuna kasuwancinta a kafafen sada zumunta, har ma ta samu shahara a kasashen waje kamar China da Qatar.