Tsohon Atoni Janar na Tarayya kuma Ministan Shari’a, Abubakar Malami, tare da ɗansa Abdulaziz Abubakar Malami, sun musanta tuhumar da ake musu kan mallakar makamai ba bisa doka ba da kuma zargin haɗa baki wajen aikata laifuka.
An gurfanar da su a gaban Babbar Kotun Tarayya da ke Abuja, inda suka ki amincewa da sabuwar tuhuma mai ɗauke da laifuka biyar da gwamnati ta shigar.
Yadda shari’ar ta gudana
Hukumar DSS ta gabatar da tuhumar farko tun a baya kan zargin ta’addanci, taimaka wa ta’addanci, da mallakar makamai ba tare da lasisi ba.
A zaman kotu na ranar Laraba, masu gabatar da ƙara sun sanar da kotu cewa an yi gyaran tuhuma, sannan aka bukaci a karanta sabuwar tuhumar ga waɗanda ake tuhuma.
Duka Malami da ɗansa sun musanta dukkan laifukan da aka karanta musu.
Abin da ake tuhumarsu da shi
A cikin sabuwar tuhumar, ana zarginsu da:
Mallakar bindiga ba tare da lasisi ba
Mallakar harsasai da aka harba da kuma sabbi
Shirya aikata abin da ake zargi da ta’addanci
Haɗa baki wajen aikata laifi
Hukuncin kotu
Alkalin kotun, Mai shari’a Joyce Abdulmalik, ta amince da su ci gaba da kasancewa a kan beli da aka ba su tun farko.
An daga shari’ar zuwa:
26 ga Mayu, 2026
16 ga Yuni, 2026
domin ci gaba da sauraron shari’ar.