Kasashen Najeriya da Italiya sun amince da kafa kwamitin hadin gwiwa domin gudanar da wani sabon gangamin samar da kudade na ilimi karkashin shirin Global Partnership for Education (GPE), da nufin tara dala biliyan 5 kafin taron ilimi na duniya da za a gudanar a birnin Rome na kasar Italiya a watan Satumban 2026.
Shirin mai suna “Multiply Possibility Campaign” na da burin inganta damar ilimi ga kimanin yara miliyan 750 a duniya tare da samar da karin dala biliyan 10 na tallafin cikin gida ga bangaren ilimi nan da shekarar 2030.
Ministar harkokin wajen Najeriya, Ambasada Bianca Odumegwu-Ojukwu, ce ta bayyana hakan yayin wata ganawa da jakadan Italiya a Najeriya, Roberto Mengoni, a Abuja ranar Laraba.
A cewarta, hadin gwiwar ya dace da manufofin gwamnatin Shugaba Bola Ahmed Tinubu na “Renewed Hope Agenda,” musamman ganin yawan matasan Najeriya da bukatar saka hannun jari a bangaren ilimi.
Ta bayyana cewa taron da gangamin tara kudaden za su taimaka wajen bai wa matasa kwarewa, samar musu da ayyukan yi da kuma rage matsalar hijira zuwa kasashen waje.
“Wannan hadin gwiwa zai taimaka wajen bai wa matasa ilimi da kwarewa tare da samar da ayyukan yi da kuma rage hijira,” in ji Odumegwu-Ojukwu.
Ministar ta kuma bukaci kasashen biyu su kara hada kai wajen magance matsalolin hijira cikin fahimta da hadin kai, tana mai jaddada kudirin Najeriya na karfafa dangantaka da Italiya.
Ta kara da cewa gwamnatin tarayya na duba hanyoyin zuba jari a bangaren kare muhalli musamman a yankunan da ke fuskantar matsaloli.
Tun da farko, Jakadan Italiya Roberto Mengoni ya ce ganawar tana da muhimmanci domin kasashen biyu su cimma matsaya kan shirye-shiryen taron ilimi na duniya da za a gudanar a Rome a watan Satumban 2026.
Ya ce baya ga ilimi, kasashen biyu sun tattauna kan harkokin yawon bude ido, tattalin arziki da kuma hadin gwiwar tsaro tsakanin Najeriya da Italiya.
Ana sa ran taron ilimi na duniya zai hada gwamnatoci da kungiyoyin ci gaba da sauran masu ruwa da tsaki domin samar da tallafi da kudade wajen bunkasa ingantaccen ilimi a duniya.