Kocin Super Eagles, Eric Chelle, ya bayyana jerin ‘yan wasan da za su wakilci Najeriya a gasar Unity Cup da kuma wasannin sada zumunci da za a yi da kasashen Poland da Portugal.
Abin da ya dauki hankali shi ne rashin sunan tsohon mai tsaron ragar Chippa United, Stanley Nwabali, daga cikin dukkan jerin sunayen ‘yan wasan. Nwabali dai shi ne mai tsaron raga na farko na Super Eagles tun bayan bajintarsa a gasar AFCON ta 2023, amma kasancewarsa babu kulob a halin yanzu na iya zama dalilin cire sunansa.
Super Eagles Za Ta Kare Kambun Unity Cup
Najeriya za ta fafata domin kare kambunta na Unity Cup a filin wasa na Charlton Athletic, The Valley, daga ranar 26 zuwa 30 ga Mayu.
Jerin ‘yan wasan gasar ya hada da kyaftin Wilfred Ndidi, mai tsaron raga Francis Uzoho, masu tsaron baya Bruno Onyemaechi da Igoh Ogbu, da kuma ‘yan gaba Moses Simon, Akor Adams da Terem Moffi tare da wasu ‘yan wasa 20.
Sabbin ‘yan wasan da aka gayyata sun hada da mai tsaron raga Arthur Okonkwo, masu tsaron baya Emmanuel Fernandez, ‘yan tsakiya Raphael Onyedika, Tochukwu Nnadi da Ebenezer Akinsanmiro, sannan da dan gaba Rafiu Durosinmi.
Haka kuma wasu ‘yan wasa daga gasar cikin gida sun samu damar shiga tawagar, ciki har da mai tsaron raga Michael Atata.
Najeriya za ta kara da Zimbabwe a wasan kusa da na karshe ranar 26 ga Mayu, inda wanda ya yi nasara zai hadu da Jamaica ko India a wasan karshe.
Wasannin Poland Da Portugal
A bangaren wasannin sada zumunci a Turai, Chelle ya zabi ‘yan wasa 24 da suka hada da kyaftin Ndidi, Alex Iwobi, mai tsaron raga Maduka Okoye, masu tsaron baya Zaidu Sanusi, Calvin Bassey da Semi Ajayi.
A gaba kuma akwai Victor Osimhen, Ademola Lookman da Paul Onuachu.
Super Eagles za ta fara da Poland a filin wasa na PGE Narodowy da ke Warsaw rpanar 3 ga Yuni kafin daga bisani ta kara da Portugal a Estadio Dr. Magalhães Pessoa ranar 10 ga Yuni.
Ana kallon wadannan wasanni a matsayin shiri mai muhimmanci gabanin wasannin neman gurbin shiga gasar AFCON, inda Najeriya ke rukuni daya da Madagascar, Tanzania da Guinea Bissau.