Gwamnatin Tarayya ta fara tattaunawa da kamfanin Springfield Agro Limited domin samar da hanyoyin tallafin kuɗi na dogon lokaci da za su taimaka wajen inganta noman zamani a kananan hukumomi 774 na kasar.
An bayyana wannan mataki ne yayin kaddamar da cibiyar sarrafa hatsi ta Afcott Grains da ke Kawakin Tofa, a jihar Kano State, wadda ake sa ran za ta sauƙaƙa wa manoma samun injinan noma kamar taraktoci da sauran kayan zamani ba tare da tsadar farko mai yawa ba.
Ministan Noma da Tsaron Abinci, Abubakar Kyari, wanda ya wakilci mataimakin shugaban kasa Kashim Shettima, ya ce gwamnati na mai da hankali wajen gina tsarin noma mai hade da samarwa, sarrafawa da kuma tallafin kuɗi.
A cewar sanarwar da shugaban sashen yada labarai na ma’aikatar, Ezeaja Ikemefuna ya fitar, ya bayyana cewa kafa wannan cibiyar sarrafa hatsi zai:
karfafa sarkar darajar noma a gida
bunkasa fitar da kaya waje
kara kudin shiga na manoma
samar da ayyukan yi
Ya kuma jaddada cewa ana ci gaba da tattaunawa tsakanin Fadar Shugaban Kasa da kamfanin domin tabbatar da tsari mai dorewa na tallafin kudi da zai tallafa wa shirin mechanisation a jihohi da kasa baki daya.
“Dole ne samarwa ya zo da sarrafawa, sannan mechanisation ya zo da tallafin kudi. Haka kuma manufofi su hadu da amincewar masu zuba jari,” in ji shi.
A bangaren zuba jari, kamfanin Chanrai Group ana sa ran zai rika samar da:
ton 40,000 na sesame
ton 25,000 na sauran hatsi a shekara
tare da samar da fiye da ayyuka 500 kai tsaye da kuma a kaikaice.
Gwamnan jihar Kano, Abba Kabir Yusuf, ya ce wannan zuba jari na nuna yadda masu zuba jari ke kara yarda da jihar, musamman duba da kokarin gwamnati wajen bunkasa:
noman zamani
ban ruwa
da kuma horar da manoma
Ya kara da cewa jihar Kano na ci gaba da zama cibiyar zuba jari a harkar noma a yammacin Afirka.