Kocin ƙungiyar Burnley FC, Scott Parker, ya bar aikinsa a kulob ɗin ta hanyar yarjejeniyar “mutual consent” mako guda kacal bayan da ƙungiyar ta faɗa gasar Championship daga Premier League.
Parker ya jagoranci Burnley ne tun a watan Yulin 2024, inda ya sanya hannu kan kwantiragin shekaru uku. Ya kuma taimaka wa ƙungiyar ta koma Premier League a farkon ƙoƙari bayan ta gama a matsayi na biyu a Championship.
Sai dai kakar wasa ta bana ta kasance mai wahala sosai ga Burnley, inda ta yi nasara a wasanni huɗu kacal cikin 34 da ta buga a gasar Premier League. A wasanni takwas na ƙarshe kuma, ta samu maki ɗaya kawai.
Rashin nasarar ƙungiyar ya kai ga sauka daga gasar Premier League bayan an doke ta 1-0 a hannun Manchester City FC a ranar 22 ga Afrilu.
Burnley kuma ta sha kashi a gasar kofuna, inda aka fitar da ita daga FA Cup da Carabao Cup a hannun ƙungiyoyi daga League One — Mansfield da Cardiff.
Bayan tafiyar Parker, mataimakinsa Mike Jackson ne zai jagoranci ƙungiyar har zuwa ƙarshen kakar wasa, inda za su fara da wasan da Leeds United a ranar Juma’a.
A cikin bayaninsa, Parker ya ce:
“Ya kasance babban alfahari na jagoranci wannan babban kulob tsawon shekaru biyu da suka gabata… Ina duba baya cikin alfahari musamman kan nasarar dawowa Premier League a 2024-25.”
Ya ƙara da cewa lokaci ya yi da dukkan bangarorin za su rabu don tafiya daban.
Tashin Parker ya zo ne a daidai lokacin da Burnley ke fuskantar matsin lamba kan makomar ƙungiyar bayan faduwa daga babban gasar Ingila.