Kamfanin bincike da hako mai na Petralon 54, reshen Petralon Energy, ya ƙaddamar da Host Community Development Trusts (HCDT) ga al’ummomin Ogoloma da Koniama (Okochiri da Koniju) da ke Ƙaramar Hukumar Okrika a Jihar Rivers.
Bikin ƙaddamar da asusun ya gudana a Port Harcourt a ranakun 22 da 23 ga Oktoban 2025, tare da halartar jami’an gwamnati, hukumomin kula da harkokin mai, shugabannin gargajiya, dattawa, shugabannin mata da sauran masu ruwa da tsaki.
Da yake jawabi a wajen taron, wanda ya kafa kuma Babban Daraktan Petralon Energy, Ahonsi Unuigbe, ya ce ƙaddamar da asusun ba wai kawai cika tanadin Dokar Masana’antar Man Fetur ta 2021 (Petroleum Industry Act – PIA) ba ne, har ma wani mataki ne na ƙarfafa haɗin gwiwa da bunƙasa al’ummomin da kamfanin ke gudanar da ayyukansa.
Ya bayyana cewa kamfanin na da burin samar da ci gaba mai ɗorewa, ƙarfafa tattalin arzikin al’umma da kuma gina kyakkyawar alaƙa tsakanin kamfanin da al’ummomin da ke karɓar baƙuncin ayyukansa.
Shi ma Babban Daraktan Petralon 54, Uduakobong Equere, ya ce sabon tsarin zai tabbatar da gaskiya, haɗin kai da ci gaba mai ɗorewa, tare da bai wa al’ummomin damar cin gajiyar albarkatun mai da iskar gas da ake hakowa a yankinsu.
A nasa jawabin, Shugaban Kwamitin Amintattu na Asusun Ci Gaban Al’ummar Okochiri, Dr. Chris Biriowu, ya yaba wa kamfanin bisa nuna gaskiya da jajircewa wajen inganta rayuwar al’umma, yana mai tabbatar da cikakken haɗin kan mutanen yankin.
Haka kuma, Shugaban Kwamitin Amintattu na Ogoloma, Chief Miebaka Tamunopekerebia, ya bayyana Petralon 54 a matsayin kamfani mai mutunta jama’a, yana mai cewa ƙaddamar da asusun wani sabon babi ne na haɗin gwiwa tsakanin kamfanonin mai da al’ummomin da suke gudanar da ayyukansu.
Dokar Petroleum Industry Act (PIA) ta 2021 ta tanadi cewa kamfanonin da ke aikin hako mai su kafa Host Community Development Trusts (HCDT) domin bunƙasa ci gaban al’ummomin da ayyukansu ke shafa, ƙarfafa zaman lafiya da tabbatar da ci gaba mai ɗorewa.