Gwamnatin Tarayya ta kara kaimi wajen inganta tattara kudaden shiga da dakile asarar kudaden gwamnati ta hanyar hada gwiwa da bankuna kan tsarin Revenue Optimisation Assurance Platform (RevOp), wani sabon tsarin dijital da aka kirkira domin kara gaskiya da rikon amana a harkokin kudaden gwamnati.
Ministan Kudi kuma Mai Kula da Tattalin Arziki na Kasa, Wale Edun, wanda Sakatare na Musamman a Ma’aikatar Kudi, Mohammed Danjuma, ya wakilta, ya bayyana hakan a wani taron wayar da kan bankuna da Ofishin Akanta Janar na Tarayya ya shirya a Abuja ranar Juma’a.
Ya ce an bullo da tsarin RevOp ne domin zamanantar da yadda hukumomin gwamnati ke tara kudaden shiga da kuma kawar da tsoffin hanyoyin hannu da suka dade suna haddasa matsaloli wajen gudanar da harkokin kudaden gwamnati.
A cewarsa, RevOp wata cibiyar dijital ce guda daya da ke bai wa hukumomin gwamnatin tarayya damar samarwa, karba, sa ido da kuma bayar da rahoton kudaden shiga kai tsaye a ainihin lokacin da ake gudanar da hada-hadar.
“RevOp wata muhimmiyar hanya ce da gwamnati ke amfani da ita wajen inganta tattara kudaden shiga, rage asarar kudade da kuma kara gaskiya a bangaren gwamnati,” in ji shi.
Ministan ya sake jaddada kudirin gwamnatin tarayya na kara kudaden shiga, bunkasa rikon amana da kuma amfani da fasaha domin inganta tafiyar da harkokin kudaden gwamnati.
Ya bayyana cewa duk da nasarorin da aka samu tun bayan fara amfani da tsarin, har yanzu akwai wasu kalubale na aiki musamman a bangaren bankuna da ma’aikatan da ke kula da karbar kudade.
A cewarsa, wasu jami’an bankuna ba su da cikakken fahimta kan yadda tsarin ke aiki da kuma hanyoyin da ya kamata su bi wajen gudanar da mu’amaloli ta cikinsa.
Ya ce irin wadannan matsaloli na iya shafar kwarewar masu amfani da tsarin da kuma nasarar shirin gaba daya.
Saboda haka, ya ce an shirya taron ne domin kara fahimtar tsarin, fayyace hanyoyin aiki, warware matsaloli da kuma karfafa sadarwa tsakanin masu gudanar da aikin da cibiyoyin hada-hadar kudi.
Ya bukaci bankuna su yada ilimin da suka samu ga ma’aikatan rassansu, masu kula da abokan hulda da kuma masu karbar kudade domin tabbatar da ingantaccen aiki.
Akanta Janar na Tarayya, Oluwatoyin Madein, wadda Felix Ogundairo ya wakilta, ta ce gwamnati ta rungumi tsarin ne domin inganta tattarawa, sa ido, daidaita bayanai da kuma bayar da rahoton kudaden shiga.
Ta ce tsarin zai kara bayyana gaskiyar kudaden gwamnati, inganta bin ka’idoji, rage asarar kudade da kuma taimakawa wajen yanke shawara bisa sahihan bayanai.
Daraktan Sashen Kudaden Shiga da Zuba Jari na Ofishin Akanta Janar, Adebayo Adewale, ya bayyana cewa sama da kashi 70 cikin 100 na hukumomin gwamnatin tarayya sun riga sun shiga cikin tsarin.
Ya ce RevOp wata manhaja ce mallakin gwamnati da aka kirkira domin hada hanyoyin tattara kudaden shiga wuri guda tare da kawar da rarrabuwar tsarin aiki tsakanin hukumomi.
A nasa bangaren, Manajan Samfurin RevOp, Idris Dosunmu, ya ce tsarin ya hada kirkirar takardar biyan kudi, karbar kudade da tura su zuwa asusun gwamnati cikin tsari guda na dijital.
Ya kara da cewa duk wata mu’amala da aka yi ta cikin tsarin tana wucewa ne ta hanyoyi masu tsaro, wanda ke tabbatar da gaskiya daga lokacin kirkirar takardar biyan kudi har zuwa lokacin da kudin suka isa asusun gwamnati.