Gwamnatin Tarayya ta bayyana cewa makomar ci gaban Najeriya, gasa a tattalin arziki da kuma ingancin ayyukan gwamnati za su dogara ne kan yadda kasar za ta anfani da fasahar zamani wajen tafiyar da harkokinta. Sakataren Gwamnatin Tarayya, Sanata George Akume, ne ya bayyana hakan a taron Digital Transformation Summit 2026 da aka gudanar a Abuja.
Cikakken Labari:
Gwamnatin Tarayya ta jaddada cewa amfani da fasahar zamani da kirkire-kirkire na dijital na daga cikin manyan hanyoyin da za su taimaka wajen bunkasa tattalin arzikin kasa da kuma inganta ayyukan gwamnati.
Sakataren Gwamnatin Tarayya (SGF), Sanata George Akume, wanda kuma shi ne Shugaban Kwamitin Daraktocin kamfanin Galaxy Backbone Limited, ya bayyana hakan ne yayin bude taron Digital Transformation Summit 2026 da aka gudanar a Abuja ranar Laraba.
Akume ya ce makomar shugabanci, tattalin arziki da kuma samar da ayyukan gwamnati ga al’umma za su kasance karkashin tsarin fasahar dijital, yana mai cewa fasaha ta zama wani muhimmin ginshiki na ci gaban kasa.
A cewarsa, gwamnatin Shugaba Bola Ahmed Tinubu ta sanya kirkire-kirkire, inganta cibiyoyi, gaskiya da bunkasar tattalin arziki cikin muhimman manufofin Ajandar Renewed Hope.
Ya bayyana cewa domin cimma wannan buri, akwai bukatar samar da ingantattun hanyoyin sadarwa, karfafa kirkire-kirkire da kuma hada kai tsakanin hukumomin gwamnati a matakai daban-daban.
Akume ya yabawa Galaxy Backbone saboda rawar da take takawa wajen samar da hanyoyin sadarwar gwamnati, ajiyar bayanai a yanar gizo, tsaron bayanai da kuma sauran muhimman ayyukan fasaha da ke taimakawa ma’aikatu da hukumomin gwamnati a fadin Najeriya.
Ya kuma yi kira ga gwamnatocin jihohi, hukumomin ICT da sauran cibiyoyin gwamnati da su kara anfani da kayayyakin more rayuwa na dijital da ake da su domin inganta gudanar da ayyuka da kuma hidima ga al’umma.
Akume ya kara da cewa Najeriya na da dukkan abubuwan da ake bukata domin bunkasa sauyin fasahar dijital, inda ya ce abin da ake bukata yanzu shi ne karin hadin kai, rungumar fasahar zamani da kuma jajircewa wajen aiwatar da manufofin sauyin dijital a dukkan matakan gwamnati.
Taron na Digital Transformation Summit 2026, wanda kuma ya zo daidai da cika shekaru 20 da kafuwar Galaxy Backbone, ya hada jami’an gwamnati, masana fasaha da sauran masu ruwa da tsaki domin tattauna hanyoyin bunkasa gwamnatin dijital da kirkire-kirkire a Najeriya.