Rundunar ‘Yan Sandan Jihar Delta ta sanar da kama wasu mutane hudu da ake zargi da hannu a wata kungiyar safarar makamai, bayan binciken da ya kai ga gano wata bindigar Beretta a wani tashar mota da ke Effurun, karamar hukumar Uvwie ta jihar.
Wadanda aka kama sun hada da Emmanuel Chukwuemeka, Clifford Boleyelefa, Amadi Princewill da Amadi Felix Chibuike. An kama su ne a jihohin Bayelsa da Imo bayan wani bincike na sirri da jami’an tsaro suka gudanar.
Kwamishinan ‘Yan Sandan Jihar Delta, CP Yemi Oyeniyi, ne ya bayyana hakan yayin taron manema labarai da aka gudanar a ranar Litinin.
A cewarsa, lamarin yana da nasaba da wata bindiga da aka gano a hannun wasu mutane ba bisa ka’ida ba a ranar 1 ga Mayu, 2026, a Effurun.
Binciken ya fara ne bayan kama Emmanuel Chukwuemeka a Jihar Bayelsa a ranar 4 ga Mayu, tare da wani abokinsa wanda ake zargin wayarsa aka yi amfani da ita wajen cinikin bindigar.
A yayin tambayoyi, Emmanuel ya amsa cewa ya sayi bindigar daga hannun Amadi Princewill kan Naira 290,000, sannan daga baya ya sayar wa wani mutum mai suna Desmond wanda har yanzu yana hannun jami’an tsaro.
Ya kuma bayyana cewa Desmond ne ya sake kai bindigar zuwa Effurun, inda aka danganta ta da wani marigayi mai suna Oghenemine Ogidi wanda aka umurce shi ya kai ta Sapele.
Bayan wannan bayani, jami’an ‘yan sanda suka kama Amadi Princewill a Jihar Imo a ranar 15 ga Mayu, 2026.
Shi ma Princewill ya amsa cewa ya sayi bindigar daga Amadi Chibuike kan Naira 200,000, lamarin da ya kai ga kama Chibuike a Owerri ranar 16 ga Mayu.
‘Yan sanda sun ce duk wadanda aka kama ana zargin su mambobi ne na kungiyar asiri ta Black Axe, yayin da ake ci gaba da farautar sauran wadanda suka tsere ciki har da Desmond.
Rundunar ta bayyana cewa za a gurfanar da wadanda ake zargin a gaban kotu bayan kammala bincike.
Sai dai Emmanuel Chukwuemeka ya ce bai san cikakken bayani kan yadda lamarin ya faru ba, yana mai cewa ya san Desmond ne kawai a matsayin mutum da ke yawan zuwa unguwarsu.
Ya kuma amince cewa shi mamba ne na kungiyar Neo Black Movement, inda ya ce ya shiga kungiyar a ranar 7 ga Janairu, 2026, amma ya musanta shiga duk wani aikin laifi.
A cewarsa, yana samun kudin shiga ne ta hanyar kasuwancinsa na halal.
- CP Oyeniyi ya tabbatar da cewa rundunar za ta ci gaba da yaki da safarar makamai da sauran ayyukan laifi domin tabbatar da tsaron rayuka da dukiyoyin jama’a.