Murtala Sule Garo ya rantsar a matsayin sabon Mataimakin Gwamnan Jihar Kano, bayan wani bikin rantsarwa da Gwamna Abba Kabir Yusuf ya jagoranta.
Babban Alkalin Jihar Kano, Mai Shari’a Dije Aboki, ce ta rantsar da Garo bisa doka, inda ya kama aiki nan take a matsayin mataimakin gwamna.
Manyan ‘yan siyasa da suka halarci bikin sun hada da tsohon Gwamnan Kano kuma tsohon shugaban jam’iyyar APC na kasa, Abdullahi Umar Ganduje; tsohon Gwamna Ibrahim Shekarau; da kuma Mataimakin Shugaban Majalisar Dattawa, Barau Jibrin.
Haka kuma shugaban Majalisar Dokokin Jihar Kano, Ismail Falgore, da kuma Sarkin Kano, Muhammadu Sanusi II, sun halarci bikin rantsarwar.
Rahotanni sun nuna cewa nadin Murtala Garo ya biyo bayan murabus ɗin tsohon Mataimakin Gwamna, Aminu Abdussalam Gwarzo, bayan sauyin siyasa da aka samu a jihar.
An bayyana cewa wannan sabon nadin na daga cikin sauye-sauyen da ke faruwa a tsarin mulkin jihar Kano.