Shahararren mawakin Najeriya, Habeeb Okikiola Badmus, wanda aka fi sani da Portable, ya yi martani kan Davido bayan fitowar bidiyon da ke nuna Davido yana murna tare da skitmaker Carter Efe bayan ya doke Portable a wani gasa.
A bidiyon da suka karade kafafen sada zumunta, an ga Davido da tawagarsa suna shagali a club, inda aka kuma ga yana rungumar Carter Efe, yayin da ɗan wasan barkwanci ke nuna bel ɗinsa na nasara.
Bayan haka, Portable ya fito ya ce Davido bai taba ba shi cikakken goyon baya ba kamar yadda mutane ke tunani.
Ya ce a ganawarsu ta farko a gidan abinci, Davido kawai ya sayi masa abinci, sannan a ganawarsu ta biyu a club ya sayi masa abin sha amma bai ba shi waka (verse) ba.
Portable ya kuma tuna cewa a baya Davido ya taba gayyatar shi cin abinci tare da ba shi takalmin alfarma, amma daga baya ya zarge shi da bada shawarar da ba ta dace ba kan harkar kiɗa.
A cewarsa, Davido ya ba shi shawarar kada ya shiga Sony Music, ya fi ba shi shawarar ya je Empire ya karɓi kudi gaba.
Portable ya ce hakan ya sa ya ji an yaudare shi, musamman ganin cewa yana neman irin nasarar da Davido ke nema a duniya kamar Grammy.
Rahotanni sun nuna cewa bayan wannan rikici, Davido ya unfollow Portable a Instagram, lamarin da ya ƙara tayar da hankali tsakanin su.
Portable ya kuma bayyana cewa ya taɓa soke show na dala 6,000 a Amurka domin ya haɗu da Davido, amma daga baya ya ji kamar an bata masa lokaci.
Ya jaddada cewa idan Davido ko wani ba zai taimaka masa ba, to su daina sa shi cikin matsin lamba.