Najeriya ta sake nuna ƙarfinta a harkar ƙwallon kwando ta duniya bayan ‘yan wasa shida masu asalin Najeriya sun samu gurbi a zaɓen NBA Draft 2026, wanda aka gudanar a cibiyar Barclays Center da ke Brooklyn, New York.
‘Yan wasan sun haɗa da Ebuka Okorie, Zuby Ejiofor, Otega Oweh, Felix Okpara, Tobi Lawal da Ugonna Onyenso, inda ƙungiyoyin NBA shida suka zaɓe su, duk da cewa ana sa ran wasu za su koma wasu ƙungiyoyi sakamakon yarjejeniyoyin musayar ‘yan wasa.
Ebuka Okorie da Zuby Ejiofor sun samu gurbi a zagaye na farko na zaɓen, yayin da Otega Oweh, Felix Okpara, Tobi Lawal da Ugonna Onyenso suka shiga a zagaye na biyu.
Ebuka Okorie, wanda ke taka leda a Jami’ar Stanford, ya kasance na 17 da Oklahoma City Thunder ta zaɓa, amma ana sa ran zai koma Detroit Pistons bayan kammala yarjejeniyar musayar ‘yan wasa.
Zuby Ejiofor, wanda ya yi fice a St. John’s University, ya kasance na 23 da Atlanta Hawks ta zaɓa.
Otega Oweh, fitaccen ɗan wasan University of Kentucky, ya kasance na 41 da Miami Heat ta zaɓa, amma ana sa ran haƙƙin mallakarsa zai koma Oklahoma City Thunder.
A kakar wasansa ta ƙarshe a jami’a, Oweh ya rika cin maki 18.6 a kowane wasa tare da satar ƙwallo 1.8, abin da ya sa aka saka shi cikin jerin All-SEC Second Team karo na biyu a jere. Haka kuma ya ci maki 35 a wasa da Santa Clara a gasar NCAA ta 2026.
Otega ya fito ne daga iyali masu fice a wasanni, domin babban ɗan uwansa, Odafe Oweh, na taka leda a gasar NFL tun bayan da aka zaɓe shi a zagaye na farko na shekarar 2021.
A bangaren sauran ‘yan wasan, Orlando Magic ta zaɓi Felix Okpara a matsayi na 46, yayin da Dallas Mavericks ta zaɓi Tobi Lawal a matsayi na 48.
Lawal, wanda ya taso a birnin London, bai fara buga ƙwallon kwando ba sai yana da shekaru 16 kafin ya koma Amurka, inda ya bunƙasa har ya zama ɗaya daga cikin fitattun matasan ‘yan wasan makaranta.
A ƙarshe, Houston Rockets ta zaɓi Ugonna Onyenso a matsayi na 53.
An haifi Onyenso ne a Jihar Imo, inda ya fara da wasan ƙwallon ƙafa kafin ya koma ƙwallon kwando bayan ya koma Amurka a shekarar 2018. Daga baya ya shiga NBA Academy Africa da ke Senegal, inda ya zama ɗaya daga cikin kaɗan da suka kammala makarantar kuma suka samu gurbi a gasar NBA.
Tun yana da shekaru 17, Onyenso ya zama mafi ƙarancin shekaru da ya wakilci tawagar ƙwallon kwando ta manyan maza ta Najeriya, kafin ya ci gaba da bunƙasa ƙwarewarsa a Amurka.
Samun gurbin waɗannan ‘yan wasa shida na nuna ci gaba da ƙaruwa da tasirin ‘yan wasan masu asalin Najeriya a babbar gasar ƙwallon kwando ta duniya.