Gwamnatin Ghana ta fice daga tattaunawar yarjejeniyar tallafin shekaru da dama da Amurka, bayan da Washington ta bukaci samun damar bayanan sirri na ‘yan kasar Ghana, a cewar wani majiyar gwamnati da AFP ta ruwaito.
Rahotanni sun ce Amurka na yin sabbin yarjejeniyoyin tallafin kiwon lafiya a sassa daban-daban na Afirka, bayan gwamnatin tsohon Shugaba Donald Trump ta rusa hukumar USAID tare da rage rawar kungiyoyin agaji (NGOs).
Majiyar ta ce: “Yarjejeniyar ta mutu,” tana mai cewa tawagar Amurka ta zama mai matsin lamba bayan Ghana ta ki amincewa da bukatar mika bayanan sirri na ‘yan kasa.
An ce sabanin ya sa tattaunawar ta yi tsami, inda bangaren Amurka ya kara matsa lamba bayan Ghana ta nuna adawa da sharadin.
Yarjejeniyar da ake tattaunawa za ta kai kimanin dala miliyan 109 na tsawon shekaru biyar, kuma an ce za ta mayar da hankali kan fannin kiwon lafiya kamar yaki da HIV/AIDS, malaria da tarin fuka.
Gwamnatin Ghana ba ta bayar da cikakken bayani ba kan lamarin, yayin da Ma’aikatar Harkokin Wajen Amurka ta ce ba ta bayyana cikakken bayanin tattaunawar kasashen biyu da ke ci gaba ba.
Lamarin ya kara nuna yadda kasashen Afirka ke sake nazarin sharuddan hadin gwiwa da kasashen waje, musamman kan batun sirrin bayanan jama’a da tsaron kasa.