Farfesa Is-haq Olanrewaju Oloyede ya ajiye muƙaminsa na Magatakardar Hukumar Shirya Jarabawar Shiga Manyan Makarantu ta Najeriya (JAMB), bayan kammala wa’adinsa na shekaru goma.
An gudanar da bikin miƙa ragamar jagorancin hukumar ga magajinsa, Farfesa Segun Aina, a hedikwatar JAMB da ke Bwari, Abuja.
Wa’adin Oloyede ya ƙare ne a ranar 31 ga Yuli, 2026, bayan ya yi wa’adi biyu a jere, inda ya jagoranci sauye-sauye masu muhimmanci a hukumar, ciki har da amfani da fasaha, ƙara gaskiya da inganta tsarin gudanar da jarabawa da bayar da guraben karatu.
Da yake jawabi yayin bikin, Oloyede ya ce zai koma cikin azuzuwan koyarwa cikin nutsuwa, yana mai godiya ga Allah da kuma ma’aikatan JAMB, gwamnati da sauran masu ruwa da tsaki bisa goyon bayan da suka ba shi.
Ya jaddada cewa nasarorin da aka samu ba nasa kaɗai ba ne, illa haɗin gwiwar ma’aikata da shugabanni.
“Zan koma aji cikin nutsuwa. Duk wata nasara da aka samu ba tawa kaɗai ba ce, sakamakon haɗin kan mutane ne.”
Oloyede ya kuma bayyana cewa JAMB ta rage kuɗin rajistar jarabawar UTME da kashi 30 cikin ɗari, tare da ƙara tallafi ga ɗalibai masu buƙata ta musamman.
Ya ce hukumar ta ba da muhimmanci ga jin daɗin ma’aikata, amma ba ta taɓa lamuntar rashin ɗa’a ba.
A nasa jawabin, sabon Magatakardar JAMB, Farfesa Segun Aina, ya gode wa Shugaba Bola Ahmed Tinubu bisa amincewa da shi, yana mai alƙawarin kare martabar JAMB da inganta tsarin jarabawa da bayar da guraben karatu.
Ya ce JAMB ba kawai hukumar shirya jarabawa ba ce, illa gada ce da ke haɗa mafarkin miliyoyin matasan Najeriya da damar samun ilimi mai zurfi.
Aina ya yi alƙawarin ƙarfafa gaskiya, inganta hidimar da ake bai wa ɗalibai da iyayensu, rage wahalhalun rajista da kuma faɗaɗa amfani da fasaha domin ƙara inganci.
Haka kuma, ya yi gargaɗi ga masu aikata maguɗin jarabawa, satar bayanai, yin bogi da sauran laifukan da ke kawo cikas ga sahihancin ayyukan JAMB, yana mai cewa hukumar za ta ci gaba da amfani da fasaha da hanyoyin doka wajen gano da hukunta masu laifi.
Ya kuma buƙaci ɗalibai su dogara da ƙwazo, shiri da gaskiya wajen neman nasara, yana mai cewa babu wata gajeriyar hanya da za ta maye gurbin aiki tuƙuru.