Kungiyar kwallon kafa ta Burnley ta sanar a ranar Alhamis cewa kocinta, Scott Parker, ya bar mukaminsa ta hanyar yarjejeniyar juna bayan kungiyar ta fadi daga gasar Firimiya ta Ingila.
A wata sanarwa da Burnley ta fitar, ta bayyana cewa Parker da shugabannin kungiyar sun amince cewa lokacinsa a Turf Moor ya zo karshe bayan kakar wasa guda daya kacal a matakin Premier League.
Parker ne ya jagoranci Burnley zuwa samun tikitin dawowa gasar Firimiya a kakar da ta gabata, bayan gagarumar nasara a Championship, inda suka yi wasanni 31 ba tare da shan kaye ba tare da kuma kafa tarihin tsaron gida mai kyau.
Sai dai wannan kakar ta Premier League ta kasance mai matukar wahala ga kungiyar, inda Burnley ta samu nasara sau hudu kacal a wasannin lig, sannan aka tabbatar da faduwarta daga gasar bayan shan kashi a hannun Manchester City da ci 1-0 ranar 22 ga Afrilu.
Burnley ta kuma yi fama da matsalar tsaro sosai, inda ta zura kwallaye 68 a raga cikin wasanni 34, mafi muni a gasar, tare da ficewa daga gasar FA Cup da League Cup a hannun kungiyoyin ƙananan matakai.
A cikin sakonsa na ban kwana, Parker ya bayyana jagorantar Burnley a matsayin babban abin alfahari.
“Na ji dadin kowanne lokaci da muka yi tare, amma ina ganin yanzu lokaci ne da ya dace kowa ya bi hanyarsa. Zan ci gaba da alfahari da nasarar da muka samu musamman dawowar Premier League,” in ji shi.
Kungiyar ta gode masa bisa kwarewa, jajircewa da gudunmawar da ya bayar.
Yanzu mataimakinsa Mike Jackson ne zai jagoranci kungiyar a wasanni hudu da suka rage kafin Burnley ta fara neman sabon koci na dindindin domin kakar wasa ta 2026/27.