Benin City, Edo – Kwamishinan Lafiya na Jihar Edo, Dakta Cyril Oshiomhole, ya yi kira ga gwamnati, abokan hulɗar ci gaba da kuma masu zaman kansu a fannin kiwon lafiya da su ƙara haɗa kai domin rage mace-macen mata masu juna biyu da jarirai, yana mai jaddada cewa bai kamata wata mace ta rasa ranta yayin haihuwa ba.
Ya bayyana hakan ne yayin bikin cika shekara bakwai na ayyukan al’umma na Med-Vical International da kuma ƙaddamar da Shirin Kiwon Lafiyar Makarantu da Shirin Kula da Mata Masu Juna Biyu da Jarirai Marasa Lafiya.
Oshiomhole ya ce gwamnatin Gwamna Monday Okpebholo ta mayar da kula da lafiyar uwa da yaro a matsayin babban fifiko ta hanyar ƙarfafa cibiyoyin kiwon lafiya na matakin farko, gyaran cibiyoyin lafiya da kuma faɗaɗa samun ingantattun ayyukan lafiya a faɗin jihar.
Ya kuma tuna da wani abin takaici na mutuwar wata uwa bayan an yi mata tiyatar haihuwa cikin nasara a Babban Asibitin Benin, yana mai cewa hakan ya nuna muhimmancin ci gaba da inganta tsarin kiwon lafiya.
A nasa jawabin, Shugaban Med-Vical International, Farfesa Ehijie Enato, ya ce Najeriya na ci gaba da fuskantar matsanancin ƙalubale wajen mace-macen mata masu juna biyu da jarirai, yana mai alƙawarin ci gaba da tallafa wa gwamnati ta hanyar inganta ayyukan lafiya, horas da ma’aikatan jinya da aiwatar da shirye-shiryen wayar da kan al’umma.
Shi ma Farfesa George Akpede ya bayyana cewa babbar matsalar Najeriya ba rashin sabbin dabarun kiwon lafiya ba ce, illa gazawar aiwatar da ingantattun hanyoyin da aka tabbatar suna ceton rayuka.