Majalisar Dinkin Duniya (UN) ta yi kakkausar suka kan kutsen da wasu mutane suka yi cikin wani ofishin ta a Tripoli, babban birnin Libya, inda aka tarar da bakin haure da ke karɓar tallafin jin ƙai.
Majalisar ta bayyana lamarin a matsayin “mummunan aiki mai tsananin tashin hankali”, tare da yin kira da a tabbatar ba a sake samun irin wannan lamari ba.
Majalisar ba ta bayyana takamaiman hukumar da abin ya shafa ba, sai dai wasu bidiyoyi da suka yaɗu a kafafen sada zumunta sun nuna wasu mutane suna tilasta shiga harabar Hukumar Kula da Hijira ta Majalisar Dinkin Duniya (IOM) da ke Tripoli.
A cikin bidiyon, an ga mutanen suna lalata tare da tarwatsa kayayyakin ofishin, yayin da aka kori wasu daga cikin mutanen da ke cikin harabar.
UN Ta Bukaci A Binciki Lamarin
IOM ta bayyana cewa Majalisar Dinkin Duniya a Libya ta yi Allah-wadai da abubuwan da suka faru a harabar cibiyar hidimar jin ƙai da wata hukumar Majalisar ke gudanarwa a Tripoli.
Majalisar ta ce ta san cewa hukumomin Libya sun ɗauki matakan gaggawa domin mayar da martani ga lamarin tare da gudanar da bincike kan yadda abin ya faru.
Ta ce binciken zai mayar da hankali kan “ayyukan da suka shafi ma’aikatan Majalisar da kuma mutanen da ke zuwa cibiyar domin samun ayyukan jin ƙai.”
Sai dai UN ta jaddada cewa ba za a sake yarda da irin waɗannan abubuwa su faru ba.
Batun Bakin Haure Ya Haifar da Ce-ce-ku-ce
Lamarin ya zo ne a daidai lokacin da batun bakin haure ke haifar da muhawara mai zafi a Libya, musamman zargin cewa akwai wasu tsare-tsare na mayar da kasar wajen da za a zaunar da bakin haure na dindindin.
A cikin ‘yan watannin baya, masu zanga-zanga sun riƙa taruwa a wajen ofisoshin hukumomin Majalisar Dinkin Duniya da suka haɗa da IOM da kuma Hukumar Kula da ‘Yan Gudun Hijira ta Majalisar Dinkin Duniya (UNHCR).
Masu zanga-zangar sun yi kira da a rufe waɗannan ofisoshin gaba ɗaya tare da korar ma’aikatansu daga kasar.
UN Ta Yi Kira da A Daina Yaɗa Bayanai Marasa Tabbaci
Majalisar Dinkin Duniya ta kuma yi kira ga jama’a da su dogara da sahihan bayanai da aka tabbatar kafin yaɗa labarai a kafafen sada zumunta da sauran wuraren jama’a.
Ta ce za ta ci gaba da aiki tare da hukumomin Libya da al’ummomin yankin domin samun mafita da kuma tabbatar da ayyukan jin ƙai sun ci gaba cikin aminci.
Tun bayan kifar da gwamnatin Muammar Gaddafi a shekarar 2011, Libya ta kasance cikin rikicin siyasa da rashin zaman lafiya, inda kasar ta rabu tsakanin gwamnatoci biyu masu adawa da juna.
Wannan rashin zaman lafiya ya kuma ba masu safarar mutane da ‘yan fasa-kwauri damar kafa hanyoyin ɓoye na safarar bakin haure da ke ƙoƙarin tsallaka Bahar Rum zuwa ƙasashen Turai.