Fitaccen mawakin Najeriya, Augustine Kelechi, wanda aka fi sani da Tekno, ya bayyana cewa matsalar rashin lafiya ce ta sa ya dauki dogon lokaci ba ya fitowa a harkar waka.
A wata hira da ya yi da Cool FM, Tekno ya ce ya samu matsala mai tsanani a igiyoyin muryarsa sakamakon cutar acid reflux, lamarin da ya hana shi iya waka na tsawon lokaci.
Mawakin ya ce abin ya fi masa zafi ne saboda mutane da dama, har ma da wasu na kusa da shi, sun dauka cewa ya zama kasalalle ne kuma ba ya son ci gaba da aikinsa.
A cewarsa, lokacin da yake fama da rashin lafiyar ya shiga wani mawuyacin hali, kuma ko bayan ya warke ya dade ba ya son jin waka saboda irin halin da ya shiga.
Tekno ya kara da cewa ya ci gaba da yin waka ne saboda yarjejeniyar aiki da yake da ita da kamfanin Universal, duk da cewa a lokacin bai da sha’awar komawa harkar waka.
Ya bayyana cewa baya ga murmurewa daga rashin lafiyar, ya kuma dauki lokaci yana warkar da radadin yadda mutane suka yi masa mummunar fahimta kafin daga bisani ya sake komawa harkar waka da cikakken kwarin gwiwa.