Wata ‘yar Najeriya da ta yi aikin ɗaukar ciki domin haihuwar jariri ga wasu iyalai (surrogacy) ta bayyana irin ƙalubalen da ta fuskanta, tana mai cewa talauci da rashin kulawar mijinta ne suka sa ta yanke wannan shawara bayan rasuwar ɗanta na biyu.
Matar, wadda ta ɓoye fuskarta, ta bayyana hakan ne a wata tattaunawa da aka wallafa a tashar Cruise TV a YouTube, inda ta yi bayani kan wahalhalun tunani, zuciya da rayuwar da masu yin surrogacy ke fuskanta.
Ta ce ɗaukar cikin da ba nata ba yana haifar da ƙaunar jaririn duk da sanin cewa ba ita ce mahaifiyarsa ba.
A cewarta, ta taɓa kira ga jinyarta tana mai cewa ba za ta iya ci gaba da ɗaukar cikin ba saboda tsananin nauyin da take ji a zuciya.
Ta bayyana cewa ta yi gestational surrogacy ta hanyar amfani da fasahar IVF, wato ba ta da alaƙar jini da jariran da ta ɗauka.
Matar ta ce mijinta ba ya ɗaukar nauyin iyali, lamarin da ya sa rayuwa ta yi musu wahala. Ta ce lokacin da ta sake samun ciki, ba su da kuɗin biyan kuɗaɗen asibiti, kuma daga ƙarshe jaririn ya rasu sakamakon matsalolin lafiya.
Ta ce wannan ne ya sa ta yanke shawarar taimaka wa iyalan da ba sa iya haihuwa, maimakon ta sake haihuwa a cikin yanayin da ba za a iya kula da ita ba.
Sai dai ta bayyana cewa ta yi kuskuren ƙin karɓar kuɗin diyya, inda ta amince a biya mata kuɗin jinya, masauki da wasu alawus kawai.
Ta ce yanzu ba za ta sake yin surrogacy ba saboda wahalhalun da ta fuskanta.
Haka kuma, ta ce ba za ta taɓa ba wa ‘yarta shawarar ta shiga irin wannan aiki ba saboda haɗarin lafiyar jiki da kuma nauyin tunani da ke tattare da shi.
Ta ƙara da cewa a lokacin da take ɗauke da cikin, ta sauya wurin zama domin guje wa zargin mutane, kuma idan aka tambaye ta game da jaririn, sai ta ce ya rasu.
A ƙarshe, ta jaddada cewa duk da surrogacy na taimaka wa ma’auratan da ke fama da matsalar rashin haihuwa, aikin ba shi da sauƙi kamar yadda mutane da dama ke zato.