Babbar Kotun Tarayya ta yi watsi da wata ƙara da ke neman a soke wasu tanade-tanaden Dokar Zaɓe ta 2026, bayan ta yanke hukuncin cewa ƙarar ba ta cika ƙa’idodin doka ba.
Mai shari’a Justice Umar ya amince da ƙorafe-ƙorafen farko da waɗanda ake ƙara suka gabatar, inda ya bayyana cewa mai shigar da ƙarar yana neman kotu ne ta fassara tanade-tanaden Kundin Tsarin Mulkin Najeriya na 1999 da kuma Dokar Zaɓe ta 2026.
Alƙalin ya ce haɗa jadawalin zaɓe na Hukumar Zaɓe Mai Zaman Kanta ta Ƙasa (INEC) da takardun ƙarar ba ya sa shari’ar ta zama ta gabanin zaɓe.
Ya kuma yanke hukuncin cewa mai shigar da ƙarar bai bi ƙa’idar aika sanarwar kafin shigar da ƙara ga Magatakardan Majalisar Dokoki ta Ƙasa ba, wanda hakan ya sa ƙarar ba ta da inganci a kansa.
Dangane da batun da ake takaddama a kai, kotun ta yi watsi da hujjar cewa Sashe na 138 na Dokar Zaɓe ta 2026 ya saɓa wa Kundin Tsarin Mulki.
Justice Umar ya bayyana cewa Kundin Tsarin Mulki ne ke fayyace sharuddan cancanta da rashin cancantar tsayawa takara, yayin da Dokar Zaɓe ke tsara hanyoyi da wa’adin shigar da ƙorafe-ƙorafen da suka shafi zaɓen fidda gwani na jam’iyyun siyasa.
Ya ce duk wanda ke son ƙalubalantar ɗan takarar da ya fito daga zaɓen fidda gwani saboda rashin cancanta, dole ne ya yi hakan a matakin shari’ar gabanin zaɓe.
Haka kuma, kotun ta ƙi soke Sashe na 77(5) na Dokar Zaɓe ta 2026, tana mai cewa Kotun Ɗaukaka Ƙara ta riga ta yanke hukunci kan wannan sashe, kuma ƙananan kotuna suna da wajibcin bin hukuncin manyan kotuna.
Saboda haka, kotun ta tabbatar da cewa tanade-tanaden Dokar Zaɓe da aka ƙalubalanta ba su saɓa wa Kundin Tsarin Mulkin Najeriya ba.