Jarumar fina-finan Nollywood, Judy Austin, ta bayyana farin cikinta kan yadda diyarta ke girma cikin sauri, inda ta nuna sha’awar kara haihuwar yara a nan gaba.
A wani sako da ta wallafa a shafukan sada zumunta, Judy ta nuna hotuna da bidiyon diyarta, Universe Yul-Edochie, tana bayyana yadda jaririyar ke nuna basira da saurin fahimta duk da karancin shekarunta.
Ta ce:
“Wannan karamar yarinya, Universe Yul-Edochie, hazika ce sosai kuma kyakkyawa ce. Ban taba ganin jaririya mai watanni 9 da za ta iya cewa ‘mummy’, ta fahimci haruffa daga A zuwa D, ta yi ‘bye bye’, ta bude baki idan aka ce mata, har ma ta sumbaci mahaifiyarta idan aka bukata ba.”
Judy ta kara da cewa irin wannan kwarewa ta diyarta na kara mata sha’awar haihuwar karin yara.
“Tana sa ni son kara haihuwar yara. Ita ce cikakkiyar ni’ima a rayuwata,” in ji ta.
Sai dai kamar yadda aka saba, wannan sako nata ya jawo martani mabambanta daga mabiyanta, musamman duba da alakar aurenta da fitaccen jarumi, Yul Edochie.
Yayin da wasu suka yaba da kulawarta da soyayyar uwa, wasu kuma sun duba sakon daga bangaren muhawarar da ke tattare da aurensu.