Masu ruwa da tsaki sun bukaci amfani da e-invoicing don inganta tattara kudaden shiga a Najeriya

Manyan masu ruwa da tsaki daga gwamnati, hukumomin kula da haraji, da kamfanoni masu zaman kansu sun hallara a Abuja domin kammala taron Interswitch Nigeria Revenue Summit, inda suka bukaci a rungumi fasahar dijital domin inganta tattara kudaden shiga a kasar nan.

Taron, wanda ya fara a Lagos kafin a kammala shi a Babban Birnin Tarayya, ya tattauna hanyoyin sabunta tsarin kudaden shiga ta hanyar amfani da fasaha, sarrafa bayanai (data automation), da kuma tsarin biyan kudi na zamani.

Masu halarta sun jaddada bukatar samar da hanyoyin da suka hada kowa da kowa, masu gaskiya, domin hada tsarin kudaden shiga na tarayya, jihohi da kananan hukumomi da manufofin kasa. Sun ce hakan zai taimaka wajen rage satar kudaden shiga da kuma kara gaskiya.

Babbar jami’ar kudi (CFO) ta Interswitch a Najeriya, Chinomso Nwachukwu, ta bayyana cewa rawar da bangaren kudi ke takawa na canzawa zuwa na dabarun ci gaba a tattalin arzikin da ya dogara da bayanai.

“E-invoicing na daya daga cikin muhimman hanyoyi da za su kara gaskiya da kuma toshe gibin kudaden shiga,” in ji ta.

Ita kuma ta jaddada cewa irin wannan tattaunawa tsakanin masu ruwa da tsaki na taimakawa wajen wayar da kai da samun goyon baya.

A nasa bangaren, manajan aikin e-invoicing a Hukumar Haraji ta Najeriya, Mohammed Bawa, ya bukaci a daidaita tsarin Najeriya da na duniya wajen dijital din haraji.

Ya bayyana e-invoicing a matsayin ginshiki na inganci da bin doka, tare da kira ga kamfanoni da cibiyoyi su rungumi tsarin gaba daya.