Fitaccen ɗan damben ajin masu nauyi na Birtaniya, Tyson Fury, ya ƙara kusantar yin babban faɗa da takwaransa Anthony Joshua, bayan da ya doke ɗan damben Poland, Mariusz Wach, ta hanyar Technical Knockout (TKO) a birnin Pattaya na ƙasar Thailand.
Fury mai shekaru 37 ya mamaye fafatawar tun daga farkonta, inda ya riƙa kai hare-hare ba tare da gajiyawa ba kan Wach mai shekaru 46.
A zagaye na bakwai ne masu kula da Wach suka janye shi daga faɗan saboda gazawarsa wajen ci gaba, wanda ya bai wa Fury nasara ta TKO.
Wannan ita ce nasara ta biyu a jere da Fury ya samu a bana bayan dawowarsa daga hutun watanni 16 da ya yi daga harkar dambe.
Yanzu hankulan masoya dambe sun koma kan fafatawar da Anthony Joshua zai yi da ɗan damben Albania, Kristian Prenga, a birnin Jeddah na ƙasar Saudiyya.
Idan Joshua ya yi nasara kamar yadda ake hasashe, hakan zai buɗe ƙofa ga fafatawar da aka daɗe ana jira tsakanin manyan zakarun damben biyu na Birtaniya.
Wannan kuma shi ne faɗan farko da Joshua zai yi a matakin ƙwararru tun bayan hatsarin mota da ya rutsa da shi a Najeriya a watan Disamban bara, wanda ya yi sanadin mutuwar abokansa biyu na kusa, Sina Ghami da Latif Ayodele.