Kasuwar hannayen jari ta Najeriya (NGX) ta ci gaba da samun karuwar daraja, inda ta kara Naira biliyan 307 a ranar Talata sakamakon karuwar sayen hannayen jari da masu zuba jari suka yi.
Jimillar darajar kasuwar ta tashi daga Naira tiriliyan 158.812 zuwa Naira tiriliyan 159.119, yayin da NGX All-Share Index (ASI) ya karu da maki 475.60, inda ya rufe ciniki a maki 246,659.56.
Manyan kamfanonin da suka jagoranci wannan ci gaba sun hada da Nigerian Exchange Group (NGX Group), MTN Nigeria, BUA Cement, Ikeja Hotel da The Initiates Plc (TIP).
Masana tattalin arziki sun bayyana cewa ana sa ran kasuwar za ta ci gaba da samun ci gaba, duk da yiwuwar wasu masu zuba jari su fara karbar ribarsu daga hannayen jarin da suka yi tashin gwauron zabi.
A bangaren ciniki, an yi musayar hannayen jari sama da miliyan 932, da kudinsu ya kai Naira biliyan 49.28, yayin da Access Holdings ta kasance kamfanin da aka fi cinikin hannayen jarinsa a ranar.