Kwamishiniyar Mata da Ci gaban Jama’a ta jihar Ondo, Ayotunde Osamaye, ta bayyana cewa taken bikin bana na Ranar Yara shi ne “Future now: promoting inclusion for every Nigerian child”, wanda ke nuni da buƙatar haɗin kai wajen tabbatar da cewa babu yaro da aka bari a baya.
Ta bayyana hakan ne yayin wani taron tattaunawa da masu ruwa da tsaki da aka shirya domin shirye-shiryen bikin Ranar Yara.
Osamaye ta ce dole ne gwamnati, iyaye, makarantu, hukumomin addini da al’umma su haɗa kai wajen tabbatar da kariya da ci gaban yara ba tare da la’akari da jinsi, nakasa, addini ko matsayi ba.
Ta yaba wa Gwamna Lucky Aiyedatiwa da matarsa, Oluwaseun, bisa goyon bayansu ga manufofin kare yara da inganta walwalarsu a jihar.
A nasa jawabin, Kwamishinan Ilimi, Igbekele Ajibefun, ya bayyana taken bikin a matsayin mai muhimmanci, inda ya jaddada bukatar inganta ilimi, lafiya da tsaro ga yara domin su dace da bukatun zamani.
Ya kuma yi kira da a ƙara tsaurara tsaro a makarantu tare da tabbatar da cewa yara suna samun kariya da damar shiga ci gaban ƙasa.
Gwamnatin Ondo ta ce tana ci gaba da aiwatar da shirye-shirye da ke da nufin inganta kariyar yara da haɗa su cikin ci gaban al’umma.