Rundunar ’Yan Sandan Jihar Anambra ta kama wasu mutane biyu da ake zargi da kera da kuma rarraba jabun giya a jihar.
Jami’in hulɗa da jama’a na rundunar, SP Tochukwu Ikenga, ya bayyana cewa an kama Ikechukwu Okeke mai shekaru 42 da Okeke Chukwuemeka mai shekaru 38 ne bayan samun sahihan bayanan sirri.
Binciken farko ya nuna cewa mutanen na cikin wata ƙungiya da ta ƙware wajen haɗawa da sayar da jabun nau’ikan giya daban-daban. Bayan amsa laifin da ake zarginsu da shi, sun jagoranci jami’an tsaro zuwa wata ƙaramin masana’anta da suke gudanar da aikin.
A wurin, jami’an ’yan sanda sun kwato kwalaben giya da ake zargin jabu ne, ciki har da Seaman’s Schnapps, McDowell’s, Eagle Schnapps, Elliot Hot Drinks da Baileys Fresh Cream. Haka kuma an samu wasu sinadarai masu haɗari da ake amfani da su wajen sarrafa jabun kayan.
An kuma kwato kwalabe marasa komai, lakabi da sauran kayan marufi da ake amfani da su wajen ci gaba da samar da jabun giyar.
Kwamishinan ’Yan Sandan jihar, CP Ikioye Orutugu, ya yaba wa jami’an da suka gudanar da samamen, tare da gargadin masu sana’ar jabun kayayyakin sha da su daina ko kuma su fuskanci hukuncin doka.
Rundunar ta ce ana ci gaba da bincike domin gano sauran mambobin ƙungiyar da kuma gano girman ayyukan da suke gudanarwa.