Matar marigayi ɗan wasan ƙwallon ƙafa na Portugal, Diogo Jota, Rute Cardoso, ta roƙi kyaftin ɗin ƙungiyar ƙwallon ƙafa ta Scotland, Andrew Robertson, da ya ɗauki burin mijinta na buga gasar Kofin Duniya yayin da yake shirin jagorantar ƙasarsa a babbar gasar ƙwallon ƙafa ta duniya.
Jota ya rasu yana da shekaru 28 a wani haɗarin mota bayan ya taimaka wa Portugal samun tikitin shiga gasar Kofin Duniya. Duk da ya buga wa ƙasarsa wasanni 49, tsohon ɗan wasan Liverpool F.C. bai taba taka leda a gasar Kofin Duniya ba saboda raunin da ya hana shi buga gasar 2022.
A cikin wata wasiƙa mai cike da tausayawa da FIFA ta wallafa, Cardoso ta tuna da ƙawancen da ke tsakanin Jota da Robertson tun lokacin da suke tare a Liverpool, da kuma mafarkin da suka yi na taka leda a gasar Kofin Duniya.
Ta bayyana cewa ta ji daɗin kalaman Robertson bayan Scotland ta samu gurbin shiga gasar, tana mai cewa hakan ya nuna mata cewa Jota bai gushe daga zukatan abokansa ba.
Cardoso ta ce Robertson ba zai je gasar shi kaɗai ba, domin zai tafi da mafarkin Jota tare da shi.
Ta kuma gode masa saboda ci gaba da tuna marigayin da kuma girmama tarihinsa.
A nasa bangaren, Robertson ya ce zai ci gaba da ɗaukar tunanin Jota a zuciyarsa a duk lokacin gasar.
“Zan ɗauke shi a zuciyata. Zai kasance tare da ni a wasa na farko, na biyu, na uku da ma bayan haka idan Allah Ya sa,” in ji Robertson.
Ya ƙara da cewa ba wai kansa kaɗai yake wakilta ba a gasar, har da marigayi Jota wanda suka yi mafarkin halartar Kofin Duniya tare.