Shahararriyar ‘yar wasan tsalle-tsallen shinge ta Najeriya, Tobi Amusan, ta ci gaba da nuna bajinta a kakar wasannin waje ta shekarar 2026 bayan ta lashe lambar zinare a gasar tseren mita 100 da shinge ta mata a New Taipei Athletics Open da aka gudanar a Taiwan ranar Lahadi.
Mai rike da tarihin duniya a wannan fanni ta lashe gasar da lokaci na dakika 12.72, inda ta doke ‘yar wasan Taiwan Bo Ya Zhang wacce ta zo ta biyu da dakika 13.17, yayin da Yi Po-an ta zo ta uku da dakika 13.37.
Nasarar da Amusan ta samu ta kuma sa ta karya tarihin gasar na dakika 12.80 da tsohuwar zakarar duniya kuma ‘yar Amurka, Nia Ali, ta kafa a baya.
Tun daga zagayen share fage Amusan ta nuna karfinta, inda ta mamaye Heat 2 kafin daga bisani ta ci gaba da irin wannan bajinta a wasan karshe.
Ta karbe ragamar gasar ne bayan tsallake shinge na hudu, sannan ta ci gaba da jan ragama har zuwa karshen tseren, inda ta ketare layin karshe da tazara mai yawa tsakaninta da sauran masu fafatawa.
Wannan shi ne karo na biyu a kakar wasa ta bana da Amusan ke kafa sabon tarihin wata gasa, bayan irin wannan nasara da ta samu a gasar Rabat Diamond League kwana guda kafin wannan gasar.
‘Yar wasan mai shekaru 28 ta fara kakar wasa ta 2026 cikin kyakkyawan yanayi, inda ta yi nasara a gasanni uku daga cikin biyar da ta fafata, tare da ci gaba da kasancewa cikin ukun farko a dukkan wasannin da ta shiga.
Da irin wannan gagarumar nasara da ci gaba da kyakkyawan yanayi, Amusan na nuna alamun cewa za ta sake yin wata babbar kaka mai cike da nasarori a fagen wasannin guje-guje da tsalle-tsalle na duniya.
Kanun Labari: Tobi Amusan Ta Kafa Sabon Tarihi, Ta Lashe Zinare A Taiwan