Hukumar Kula da Wutar Lantarki ta Najeriya (NERC) da Ofishin Mai Bai Wa Shugaban Ƙasa Shawara Kan Tsaro (ONSA) sun fara ƙarfafa haɗin gwiwa domin dakile yawaitar lalata kayan aikin lantarki da kuma kare muhimman kadarorin wutar lantarki a faɗin ƙasar nan.
Shugaban NERC, Musiliu Oseni, ne ya bayyana hakan yayin da ya karɓi baƙuncin tawagar ONSA a wata ziyara ta musamman da aka shirya domin ƙarfafa haɗin gwiwa tsakanin hukumomin biyu wajen kare kayayyakin lantarki.
A cikin wani saƙo da NERC ta wallafa a shafinta na X ranar Laraba, Oseni ya jaddada muhimmiyar rawar da ONSA ke takawa wajen kare kadarorin lantarki na ƙasa.
Ya bayyana cewa ci gaba da haɗin kai tsakanin hukumomin biyu zai taimaka wajen rage yawaitar lalata kayayyakin lantarki da kuma inganta samar da wutar lantarki a ƙasar nan.
Shugaban tawagar ONSA kuma Daraktan Kula da Muhimman Kadarori da Kayayyakin Ƙasa, AVM Enebong Effiom, ya ce akwai buƙatar ƙara ƙarfafa haɗin gwiwa domin kare kadarorin da ke bangaren lantarki.
Ya ce dole ne hukumomin biyu su haɗa kai wajen dakile hare-hare da lalata kayayyakin lantarki da ke haddasa matsalolin samar da wuta tare da ƙara wa jama’a wahala.
Daga cikin muhimman matakan da aka amince da su yayin taron akwai kafa wani haɗin gwiwar masu ruwa da tsaki domin yaƙi da lalata kayayyakin lantarki, samar da kundin bayanai na bai ɗaya kan kadarori da hare-haren lalata kayayyaki, da kuma ƙirƙirar wata hanya ta kai rahoton gaggawa domin sauƙaƙa kama masu aikata laifuka da gurfanar da su a gaban kotu.
Bangarorin biyu sun bayyana shirinsu na ci gaba da aiwatar da matakan da aka cimma tare da haɗa sauran hukumomi da masu ruwa da tsaki domin tabbatar da tsaro da inganta samar da ingantacciyar wutar lantarki ga al’umma.