Lionel Messi ya ci kwallo tare da bayar da taimako yayin da Inter Miami ta doke Portland Timbers da ci 2-0, inda ta samu nasararta ta farko a sabon filinta.
Messi, tsohon tauraron Barcelona mai shekaru 38, ya zura kwallonsa ta 12 a kakar wasa ta Major League Soccer bayan kammala wata kyakkyawar hadakar wasa da bugun kafar hagu mai karfi.
Daga bisani, ya sake nuna kwarewarsa bayan kutsawa cikin yankin bugun fanareti tare da bai wa German Berterame kwallo, wanda ya kara ta biyu kafin a tafi hutun rabin lokaci.
A yanzu, Messi ya taka rawar gani sosai, inda ya samu kwallaye biyar da kuma taimakawa shida a wasanni hudu da suka gabata.
Inter Miami ta koma sabon filinta mai daukar mutane 26,700 mai suna Nu Stadium a watan Afrilu bayan shafe shekaru shida tana buga wasa a Fort Lauderdale.
Sai dai kafin wannan nasara, kungiyar ta yi kunnen doki sau uku sannan ta sha kashi sau daya a wasanninta hudu na farko a sabon filin.
Kungiyar karkashin jagorancin Guillermo Hoyos yanzu tana matsayi na biyu a Gabashin Teburin MLS da maki 28 bayan wasanni 14, maki biyu kacal a bayan Nashville.
Inter Miami na kokarin kare kofin MLS Cup da ta lashe a bara, yayin da za ta buga wasanta na karshe kafin hutun gasar cin kofin duniya da Philadelphia Union ranar 24 ga Mayu.