Rundunar Amotekun ta jihar Osun ta bayyana cewa ta mika jami’anta hudu ga rundunar ’yan sandan jihar domin taimakawa wajen gudanar da bincike kan kisan Olalekan Oyeyemi, wanda aka fi sani da ‘Emir’, a wani tashar mota da ke Ile-Ife.
Kakakin rundunar, Yusuf Idowu, ne ya bayyana hakan a wata sanarwa da ya fitar ranar Litinin, yana mai cewa matakin ya zama dole ne domin gyara wani rahoto da ke yawo a kafafen sada zumunta cewa ’yan sanda sun kama wasu jami’an Amotekun bisa zargin hannu a mutuwar Oyeyemi.
Oyeyemi, wanda yake daya daga cikin shugabannin jam’iyyar Accord Party a jihar, ya mutu ne a lokacin wani rikici da ya barke a Mayfair Motor Park da ke Ile-Ife ranar Lahadi, 13 ga Satumba.
Rahotanni sun ce a lokacin mutuwarsa, Oyeyemi yana cikin shirin samun naɗin zama shugaban Park Management System, tsarin da gwamnatin jihar ta shirya domin maye gurbin ayyukan National Union of Road Transport Workers, NURTW, wajen gudanar da tashoshin motocin haya a jihar.
Sai dai Amotekun ta jaddada cewa ’yan sanda ba su kama jami’an rundunar ba.
A cewar rundunar, Kwamandan Amotekun na Osun, Adekunle Isaac Omoyele, ne da kansa ya mika jami’an hudu da ke aiki tare da wani shugaban NURTW, Alowonle Nurudeen, ga rundunar ’yan sandan jihar.
Ta ce an dauki matakin ne domin tabbatar da gaskiya, rikon amana da gudanar da cikakken bincike kan lamarin, tare da bai wa ’yan sanda damar gano ainihin abubuwan da suka faru yayin hare-haren da aka kai a Ile-Ife.
Amotekun ta bukaci jama’a da kafafen yada labarai su bambanta tsakanin kama mutum da kuma mika mutum da kansa domin gudanar da bincike, tana mai gargadin cewa bai kamata a karkatar da bayanan lamarin ko a yada su cikin salo mai tayar da hankali ba kafin kammala binciken ’yan sanda.
Rundunar ta kuma tabbatar da cewa za ta ci gaba da bin ka’idojin kwarewa, ladabtarwa da rikon amana, tare da yin aiki kafada da kafada da sauran hukumomin tsaro.
Ta kara da cewa ba za ta amince da rashin da’a ko wani hali da zai iya rage amincewar jama’a ga tsarin tsaron jihar ba.