Kamfanin PZ Cussons Nigeria Plc ya samu kudaden shiga da suka kai N260.46 biliyan a rubu’in farko na shekarar kuɗi ta 2027.
Kamfanin ya bayyana hakan ne a cikin sakamakon kuɗinsa da ba a tantance ba, wanda aka fitar a kasuwar hada-hadar hannayen jari ta Najeriya.
A cewar rahoton, kudaden shigar kamfanin sun samu ƙaruwa idan aka kwatanta da na makamancin lokacin shekarar da ta gabata.
Binciken sakamakon ya nuna cewa kuɗin da kamfanin ya kashe wajen samar da kayayyaki ya tashi da kashi biyar cikin 100, daga N43.11 biliyan a rubu’in farko na 2025 zuwa N45.06 biliyan a rubu’in farko na 2026.
Haka kuma, ribar da kamfanin ya samu bayan cire kuɗaɗen samar da kayayyaki ta ƙaru da kashi 24 cikin 100, daga N15.90 biliyan zuwa N19.78 biliyan.
Jimillar ribar gudanar da harkokin kamfanin kuwa ta kai N8.54 biliyan, idan aka kwatanta da N5.85 biliyan a makamancin lokacin da ya gabata, lamarin da kamfanin ya ce ya nuna samun ci gaba a harkokin gudanar da kasuwancinsa.
Sakatariyar kamfanin, Oghenekevwe Ogefere, ta ce an samu ƙarin ribar gudanar da harkokin kasuwanci da kashi 39 cikin 100 sakamakon haɗuwar ƙaruwa a yawan kayayyakin da aka sayar da kuma tsarin farashi mai kyau.
Ta kuma danganta ci gaban da ƙarfin kamfanin da shaharar kayayyakin kamfanin a sassa daban-daban na kasuwa.
A cewarta, sakamakon ya nuna ci gaba da mayar da hankali wajen samun ɗorewar ƙaruwa a kudaden shiga, inganta yadda ake gudanar da ayyuka da kuma ƙarfafa ginshiƙan kasuwancin kamfanin.
Ogefere ta bayyana cewa ribar kamfanin kafin cire haraji ta kai N9.09 biliyan, yayin da ribar bayan cire haraji ta kai N4.63 biliyan.
Sai dai ta ce waɗannan alkaluma sun yi ƙasa da na makamancin lokacin shekarar da ta gabata, saboda a wancan lokacin kamfanin ya samu wasu kuɗaɗen shiga na musamman da ba sa maimaituwa, waɗanda suka kai N15.74 biliyan.
A rubu’in da ake magana a kai kuwa, kamfanin ya samu N0.51 biliyan daga irin waɗannan kuɗaɗen shiga na musamman.
Kamfanin ya kuma bayyana cewa ribar da ake samu daga kowace naira ta kudaden shiga ta inganta, inda babban ribar kasuwanci ta ƙaru zuwa kusan kashi 30.5 cikin 100, daga kashi 26.9 cikin 100 a shekarar da ta gabata.
Ogefere ta jaddada cewa PZ Cussons Nigeria na ci gaba da mayar da hankali wajen tabbatar da ɗorewar ƙaruwa a kudaden shiga, inganta harkokin gudanar da kasuwanci da kuma samar da ƙima mai ɗorewa ga masu ruwa da tsaki.