Ɗan takarar shugaban ƙasa na jam’iyyar African Action Congress (AAC), Omoyele Sowore, ya bayyana cewa ya dawo Najeriya bayan shafe sama da watanni 20 yana zaune a ƙasar Amurka.
Sowore ya bayyana hakan ne a cikin wata sanarwa da ya fitar ga manema labarai a ranar Lahadi, inda ya bayyana farin cikinsa na komawa ga iyalinsa da kuma ƙasarsa bayan tsawon lokacin da ya yi a ƙasar Amurka.
A cewarsa, ya bar Najeriya ne sakamakon abin da ya bayyana a matsayin kama shi, tsare shi, takaita masa tafiye-tafiye da kuma ƙwace fasfo ɗinsa na ƙasa da ƙasa da hukumomin tsaron Najeriya suka yi.
Sowore ya ce a lokacin da yake Amurka, ya ci gaba da hulɗa da ‘yan Najeriya da ke zaune a ƙasashen waje, magoya bayansa, masu fafutuka da sauran masu ruwa da tsaki domin tattauna halin da ƙasar ke ciki da kuma manufofinsa na siyasa.
Ya kuma bayyana cewa ya halarci wata zanga-zangar nuna goyon baya ga Falasɗinawa a birnin New York, tare da ci gaba da fafutukar ganin an bai wa ‘yan Najeriya da ke zaune a ƙasashen waje damar kada kuri’a a zaɓukan Najeriya.
Ɗan takarar AAC ya ce har yanzu yana nan kan matsayinsa na ganin cewa ‘yan Najeriya mazauna ƙasashen waje ya kamata su samu damar shiga cikin tsarin dimokuraɗiyyar ƙasar.
Ya ce idan aka zaɓe shi a matsayin shugaban ƙasa a zaɓen 2027, gwamnatinsa za ta yi ƙoƙarin aiwatar da tsarin da zai bai wa ‘yan Najeriya mazauna ƙasashen waje damar kaɗa ƙuri’a.
Sowore ya bayyana cewa ana sa ran zai isa filin jirgin saman Murtala Muhammed da ke Legas, kafin daga bisani ya zarce zuwa Abuja.
Haka kuma, ya ce zai ci gaba da halartar zaman kotu da suka shafi ƙarar da Hukumar Tsaro ta Farin Kaya (DSS) ta shigar da shi kan zargin aikata laifukan intanet a shekarar 2025.
Zai Fara Sabon Zagayen Yaƙin Neman Zaɓe
Sowore ya ce dawowarsa Najeriya zai kasance farkon wani sabon mataki na yaƙin neman zaɓensa na ƙasa baki ɗaya gabanin zaɓen shugaban ƙasa na shekarar 2027.
Ya bayyana cewa zai gudanar da ganawa da ƙungiyoyin ma’aikata, ɗalibai, matasa, mata, manoma, ‘yan kasuwa, ƙwararru da sauran al’ummomi a sassan ƙasar.
A cewarsa, tattaunawar za ta mayar da hankali ne kan batutuwan siyasa, zamantakewa da tattalin arziki da aka bayyana a cikin ajandar AAC ta 2027.
Ya ce yaƙin neman zaɓen zai mayar da hankali kan batutuwan da suka haɗa da daidaiton ‘yanci, adalci, zaman lafiya, tsaro da bunƙasa tattalin arziki.
Sowore ya ce zaɓen shekarar 2027 zai bai wa ‘yan Najeriya damar yanke shawara kan alkiblar shugabancin siyasar ƙasar.
Ya ce:
“Yaƙin neman zaɓena zai ci gaba da yin kira ga sauye-sauye na asali a fannonin siyasa, zamantakewa da tattalin arziki.”
Ɗan takarar AAC ya kuma jaddada cewa zai ci gaba da kai saƙonsa kai tsaye ga ‘yan Najeriya ta hanyar gudanar da taruka da tattaunawa a sassan ƙasar yayin da ake tunkarar zaɓen 2027.