Gwamnan Kwara Ya Gabatar Da Littafin ‘The Female Diplomat’ Da Ya Kawo Tarihin Mata 50

Gwamnan Jihar Kwara, AbdulRahman AbdulRazaq, ya kasance cikin waɗanda suka gabatar da littafin ‘The Female Diplomat’, wanda ya kunshi tarihin gudummawa da nasarorin mata 50 da suka yi fice a harkokin hidimar jama’a, musamman a fagen hulɗa da diflomasiyya a matakin ƙasa da ƙasa.
Gwamnan ya bayyana hakan ne a wani saƙo da ya wallafa a shafinsa na Facebook a ranar Lahadi, inda ya ce an gudanar da taron gabatar da littafin ne a gefen taron Majalisar Ɗinkin Duniya (UNGA) da ke gudana a birnin New York na ƙasar Amurka.
Littafin wanda Oluwakemi Amuda ta rubuta, ya tattara labarai da nasarorin mata da suka taka muhimmiyar rawa wajen hidimar jama’a da diflomasiyya, duk da ƙalubalen da suka fuskanta a yayin gudanar da ayyukansu.
AbdulRazaq ya ce taron ya kuma ba shi damar gabatar da irin abubuwan da Jihar Kwara ta samu da kuma irin ci gaban da ake samu a jihar ga mutane daga sassa daban-daban na duniya.
Da yake bayyana muhimmancin littafin, gwamnan ya ce labaran da ke cikinsa na tunatar da al’umma cewa diflomasiyya ba ta tsaya ne kawai kan ƙasashe da hukumomi ba, domin tana da alaƙa da mutane, wakilci, asali da kuma jajircewar mutum wajen shiga wuraren da ake yanke muhimman shawarwari.
Ya ce:
“Taron ya ba ni wata dama ta sake raba kyakkyawar kwarewar da muke samu a Kwara tare da manyan masu sauraro na duniya.
“Labarun da ke cikin ‘The Female Diplomat’ suna tunatar da mu cewa diflomasiyya ba wai kawai ta shafi ƙasashe da hukumomi ba ce; tana kuma shafar mutane, wakilci, asali da kuma ƙarfin hali na shiga wuraren da ake yanke shawara, duk da irin ƙalubalen da mutum zai iya fuskanta.”
Gwamnan ya kuma nuna godiyarsa ga mutanen da suka halarci taron, tare da waɗanda suka ba da kalaman goyon baya da nuna haɗin kai yayin gudanar da bikin gabatar da littafin.
Littafin ‘The Female Diplomat’ ya mayar da hankali ne kan irin rawar da mata 50 suka taka a hidimar jama’a da diflomasiyya, tare da bayyana gudummawar da suka bayar wajen wakiltar al’ummominsu da kuma shiga harkokin yanke shawara a matakai daban-daban.