Mataimakin Shugaban Ƙasa, Kashim Shettima, ya cika shekara 60 a yau Laraba, inda ya roƙi ’yan Najeriya da abokansa da magoya bayansa da kada su kashe kuɗi wajen sayen masa kyauta ko shirya masa bukukuwa.
Shettima ya bayyana cewa maimakon a kashe kuɗi wajen taya shi murnar cikar shekaru 60, ya fi so a karkatar da kuɗin zuwa ga agaji, ƙungiyoyin taimako ko kuma mutanen da ke cikin buƙata a faɗin ƙasar.
A cikin wani saƙo da ya wallafa a shafinsa na X a daren Talata, Mataimakin Shugaban Ƙasar ya ce wannan matsayinsa ne da ya daɗe yana bayyana wa abokai, magoya baya da masu yi masa fatan alheri.
Ya ce cikar shekaru 60 ta ƙara masa fahimtar cewa irin wannan lokaci ya kamata a yi amfani da shi wajen yin tunani da nuna godiya da kuma taimakon jama’a, maimakon tarawa da nuna isa.
Shettima ya bayyana cewa babu wanda yake kaiwa wani matsayi mai muhimmanci a rayuwa shi kaɗai, domin kowa yana amfana da taimakon iyali, abokai, malamai, abokan aiki da ma wasu baƙi.
Saboda haka, ya ce ya dace mutum ya mayar da alherin da aka yi masa ta hanyar taimakon waɗanda ba za su iya rama masa alherin ba.
Mataimakin Shugaban Ƙasar ya kuma roƙi ’yan Najeriya da su maye gurbin kyaututtuka da tallace-tallacen taya murna da addu’a.
Ya ce abin da yake buƙata daga gare su shi ne su yi masa addu’a tare da yi wa Najeriya addu’ar samun zaman lafiya, ci gaba, da shugabanci nagari.
Shettima ya kuma bayyana cewa Najeriya na da dimbin albarkatu, ciki har da matasa masu basira, hazaka da burin ganin ƙasar ta ci gaba.
A ƙarshe, ya gode wa ’yan Najeriya bisa goyon baya da fatan alheri da suka ci gaba da nuna masa tsawon shekaru, tare da yi musu fatan tsawon rai, lafiya, cikar buri da kuma farin cikin taimakon waɗanda ke buƙatar taimako.
Me za ku ce game da wannan roƙon na Mataimakin Shugaban Ƙasa? Shin ya dace a mayar da kuɗin kyautar ranar haihuwa zuwa taimakon masu buƙata?