Kungiyar Tarayyar Afirka (AU) ta sanar da cewa za a kaddamar da Hukumar Tantance Darajar Bashi ta Afirka (African Credit Rating Agency – AfCRA) a hukumance a ranar 7 ga Oktoba, 2026, a Port Louis, babban birnin Mauritius, inda hedkwatar hukumar take.
Kaddamar da hukumar na zuwa ne a matsayin wani muhimmin mataki da Afirka ke dauka wajen kara samun ‘yancin cin gashin kanta a harkokin kudi, musamman wajen yadda ake tantance karfin tattalin arzikin kasashen nahiyar da darajar basussukansu.
AU ta bayyana AfCRA a matsayin wani babban ci gaba wajen tabbatar da ikon Afirka na tsara labarinta na tattalin arziki da kuma rage dogaro da manyan hukumomin tantance darajar bashi na duniya.
Kungiyar ta ce tsawon shekaru, yadda ake kallon hadarin zuba jari a Afirka ya sanya kasashen nahiyar ke biyan karin kudin ruwa da ake kira “risk premium” wajen samun rance a kasuwannin duniya.
A cewar AU, AfCRA za ta samar da wata hanya ta tantance darajar bashi da ta fi la’akari da yanayin tattalin arzikin Afirka, juriyar tattalin arzikin kasashen nahiyar da kuma damar samun ci gaba.
Hukumar za ta kasance wata madadin ra’ayi ga manyan hukumomin tantance darajar bashi na duniya kamar Fitch Ratings, Moody’s Ratings da S&P Global Ratings.
Wannan shiri ya samo asali ne daga korafe-korafen da wasu gwamnatocin Afirka da masu tsara manufofi suka dade suna yi kan yadda ake tantance hadarin basussukan kasashen nahiyar.
Kasashe irin su Ghana da Zambia sun taba nuna damuwa kan yadda rage darajar bashin kasashensu ke kara musu tsadar samun rance tare da kara tsananta matsalolin basussuka.
Haka kuma, African Peer Review Mechanism (APRM) ta taba sukar Fitch Ratings kan yadda ta tantance African Export-Import Bank, inda ta zargi hukumar da rashin fahimtar yadda wasu cibiyoyin hada-hadar kudi na Afirka ke aiki.
Sai dai Fitch ta kare tsarin aikinta, tana mai cewa ratings dinta suna amfani da ka’idoji na duniya masu daidaito da kuma bayyana gaskiya.
Tun farko dai an shirya kaddamar da AfCRA ne a watan Satumba na 2025, amma daga baya aka dage shirin.
Domin kare martabarta da samun ‘yancin cin gashin kanta, hukumar ba za ta kasance mallakar gwamnatocin Afirka kai tsaye ba.
Ana kuma sa ran za ta fi mayar da hankali wajen tantance darajar takardun bashi da ake bayarwa a cikin kudaden kasashen Afirka.
Kungiyar Tarayyar Afirka ta ce kaddamar da AfCRA zai nuna cewa Afirka na da karfin gina nata cibiyoyin kudi, tsara yadda duniya za ta fahimci tattalin arzikinta, da kuma samun karin iko kan makomarta ta fuskar kudi.
Ana sa ran kaddamar da hukumar a ranar 7 ga Oktoba, 2026, a Mauritius zai jawo hankalin kasashen Afirka da masu zuba jari, yayin da nahiyar ke kokarin sauya yadda ake kallon darajar tattalin arzikinta a kasuwannin duniya.