Hukumar Kula da Tashoshin Jiragen Ruwa ta Najeriya (NPA) ta taimaka wajen gano, kwato da kuma fitar da muhimman kayan aikin wutar lantarki na Niger Delta Power Holding Company (NDPHC) da aka dade an bar su a tashoshin jiragen ruwa daban-daban.
NDPHC ta ce matakin zai taimaka wajen hanzarta wasu muhimman ayyukan samar da wutar lantarki a fadin Najeriya, tare da kare kamfanin daga asarar da za ta iya kai wa biliyoyin naira.
Manajan Daraktan NDPHC, Injiniya Jennifer Adighije, ce ta bayyana hakan yayin da ta jagoranci tawagar kamfanin zuwa ziyara wajen Manajan Daraktan NPA, Dakta Abubakar Dantsoho, a Legas.
Adighije ta yaba da matakin NPA, inda ta ce kayan aikin na da matukar muhimmanci wajen aiwatar da ayyukan inganta samar da wutar lantarki a kasar.
Ta kuma bukaci hukumomin biyu da sauran hukumomin da abin ya shafa su kara hadin gwiwa domin kauce wa tsaiko da jinkirin da kan kawo karin kudin ayyuka.
A nasa bangaren, Dantsoho ya tabbatar da cewa NPA za ta ci gaba da taimakawa wajen saukaka kwashe da fitar da muhimman kayan aikin da ake bukata domin ayyukan more rayuwa da bunkasa tattalin arzikin Najeriya.