Jihar Abia ta zama jiha ta uku mafi saurin samun ci gaba a Najeriya, kamar yadda rahoton 2026 Philips Consulting State Performance Index Momentum Index ya bayyana.
Rahoton ya nuna cewa Abia ta samu maki +0.67, inda ta zo bayan Enugu (+1.15) da Jigawa (+0.77) kacal.
Abia ta zarce jihohi da dama da suka haɗa da Osun, Kano, Gombe, Akwa Ibom, Ogun, Legas, Imo da Anambra a jerin jihohin da aka tantance.
A wata sanarwa da Kwamishinan Yaɗa Labarai na jihar, Prince Okey Kanu, ya fitar, gwamnatin jihar ta ce wannan nasara ta nuna irin gagarumin sauyin da ake samu ƙarƙashin jagorancin Gwamna Alex Otti.
Sanarwar ta ce sauye-sauyen da gwamnatin jihar ke aiwatarwa a fannonin gine-ginen ababen more rayuwa, ilimi, lafiya, fasahar zamani, tsaro, gyaran tsarin gwamnati, noma da bunƙasa tattalin arziki ne suka haifar da wannan ci gaba.
Haka kuma, gwamnatin ta ce sake gina manyan hanyoyi, kafa Smart Schools, inganta tsarin gudanar da gwamnati da tattara kuɗaɗen shiga, farfaɗo da masana’antu, ƙarfafa matasa da jawo masu zuba jari na daga cikin abubuwan da suka taimaka wajen samun wannan matsayi.
Gwamnatin Abia ta jaddada aniyarta na ci gaba da aiwatar da shirye-shiryen ci gaba domin inganta rayuwar al’ummar jihar, tana mai cewa wannan rahoto ya tabbatar da tasirin gyare-gyaren da take aiwatarwa.